Міліцыянтаў адправілі разгружаць склады

Супрацоўнікі МУС падключыліся да вырашэння самай актуальнай праблемы беларускіх прадпрыемстваў.

Гаворка ідзе аб разгрузцы складоў, заваленых неліквідам, піша «Ежедневник». Вырашыць гэтую праблему ўлады спрабуюць яшчэ з пачатку года. Пры гэтым для вырашэння праблемы былі задзейнічаныя ў тым ліку і адміністрацыйныя рычагі. Канцэрны і міністэрствы спускаюць падначаленым прадпрыемствам заданні па разгрузцы складоў, а суб'ектаў гаспадарання, асабліва рэтэйлераў, вымушаюць купляць беларускі неліквід замест імпартных тавараў. Аднак усе гэтыя меры не прывялі да вынікаў, якія чакаюцца. З пачатку 2013 года склады калі дзе і разгрузіліся, то ў асноўным за кошт росту дэбіторскай запазычанасці. Гэта выклікала буру абурэння Лукашэнкі, які прыгразіў, што калі да канца года ўрад не разгрузіць склады і не прыме меры па пагашэнні дэбіторскай запазычанасці, то ў адстаўку будуць адпраўленыя ўсе: і прэм'ер, і яго намеснікі. Між тым, па дадзеных Камітэта дзяржаўнага кантролю, на кастрычнік на складах некаторых дзяржпрадпрыемстваў да гэтага часу ляжыць паўгадавы запас прадукцыі.

Напэўна, менавіта таму, вычарпаўшы ўсе адміністрацыйныя рэсурсы, урад упершыню ў гісторыі Беларусі вырашыў ужыць сілавыя метады разгрузкі складоў дзяржпрадпрыемстваў і прыцягнуць для гэтых мэтаў МУС.

Якім чынам гэта было зроблена - з дапамогай нейкага нарматыўнага дакумента або проста тэлефоннага званка, пакуль не ясна. Але цяпер у справаздачах, якія шлюць у МУС розныя падраздзяленні, ёсць і згадка пра тое, як яны разгружаюць склады дзяржпрадпрыемстваў. Вось канкрэтны вельмі характэрны прыклад.

Гомельскі філіял РУП «Белтэлекам» праводзіў тэндэр па закупцы камунікацыйнага абсталявання. У ходзе гэтых таргоў пераможцам стала НП ЗАТ «БелТэхСувязьДэталь», якое прадаставіла на конкурс сертыфікат уласнай вытворчасці УП «Менскае аддзяленне «Беларускай гандлёва-прамысловай палаты». Пра тое, як у Беларусі дзеляцца тэндэры пры дапамозе выдачы фальшывых сертыфікатаў уласнай вытворчасці, незалежныя СМІ пісалі не раз. Тут карупцыя пусціла такія глыбокія карані, што перад ёй нямоглыя ўсе сілавыя ведамствы - занадта велізарныя сродкі тут круцяцца, занадта шмат людзей корміцца.

У дадзеным выпадку адбылося нешта падобнае, але сутнасць не ў гэтым, а ў тым, з якога боку МУС падышло да вырашэння праблемы і якія мэты пераследвала.

Адным з удзельнікаў таргоў з'яўлялася ААТ «Прамсувязь», якое ўваходзіць у структуру Міністэрства сувязі і інфарматызацыі. Доля дзяржавы ў прадпрыемстве складае больш за 99%, і пры гэтым на ім таксама ёсць праблема загружанасці складоў. Але ААТ «Прамсувязь» не здолела выйграць тэндэр. Пераможцам таргоў стала кампанія, якая выдала за прадукцыю ўласнай вытворчасці імпартны тавар, атрымаўшы адпаведныя прэферэнцыі на тэндэры.

Як канстатаваў АБЭЗ Савецкага РУУС Менска, якое было падключана да правядзення праверкі, НП ЗАТ «БелТэхСувязьДэталь» прадаставіла заказчыку недакладныя звесткі пра фактычнага вытворцу прадукцыі, дзякуючы чаму і выйграла конкурс.

Нават сляпому бачныя відавочныя прыкметы тэндэрнай карупцыі, бо справа не толькі ў прыватнай кампаніі, якая выдала за беларускі імпартны тавар, але і ў членах тэндэрнай камісіі РУП «Белтэлекам», якіх складана западозрыць у тэхнічным крэтынізме і ў тым, што яны не змаглі зразумець, дзе сапраўды выраблена абсталяванне. Кошт пытання - больш за 10 мільярдаў рублёў.

Аднак праявы карупцыі змагароў з эканамічнай злачыннасцю цяпер хвалююць менш за ўсё. Галоўная задача - максімальна разгрузіць склады дзяржпрадпрыемстваў. Таму АБЭЗ проста змушае Гомельскі філіял РУП «Белтэлекам» скасаваць дамову з НП ЗАТ «БелТэхСувязьДэталь» і заключыць яе з ААТ «Прамсувязь» на суму больш за 11,5 мільярда рублёў. Але самае дзіўнае адбылося далей. Замест таго каб прыняць меры да парушальніка закона ў асобе НП ЗАТ «БелТэхСувязьДэталь», АБЭЗ проста змушае яго таксама купіць у ААТ «Прамсувязь» прадукцыю, так бы мовіць, аказаць пасільную дапамогу ў разгрузцы складоў. Вось як гэта гучыць у дакладзе супрацоўнікаў АБЭЗ.

«Дадаткова паміж ААТ «Прамсувязь» і НП ЗАТ «БелТэхСувязьДэталь» заключаныя дамовы, па якіх НП ЗАТ «БелТэхСувязьДэталь» набыло шафы аптычныя размеркавальныя на агульную суму 405 мільёнаў рублёў. Такім чынам, у выніку праведзеных АБЭЗ Савецкага РУУС праверачных мерапрыемстваў скарочаныя складскія запасы і колькасць незавершанай вытворчасці ў ААТ «Прамсувязь», забяспечаная запатрабаванасць і далейшая вытворчасць гэтай прадукцыі».

І ні слова пра парушэнне закона і пра тое, якія меры прынятыя да парушальнікаў. Але ўзнікае слушнае пытанне: якое дачыненне супрацоўнікі АБЭЗ Савецкага РУУС маюць да разгрузкі складоў і хто іх гэтым азадачыў?