«Беларусбанк» зможа скасоўваць дамовы з даўжнікамі

«Беларусбанк» атрымаў новыя паўнамоцтвы па скасаванні дамоваў з фізічнымі асобамі, якія не пагашаюць крэдыты.

Лукашэнка падпісаў указ N454, якім унёс шэраг змяненняў і дапаўненняў у раней прынятыя ўказы, у тым ліку ўказ N13, які рэгулюе пытанні прадастаўлення грамадзянам дзяржпадтрымкі пры будаўніцтве і куплі жылля.

Як паведамляе прэс-служба беларускага кіраўніка, ААТ «АСБ Беларусбанк» прадастаўляюцца дадатковыя паўнамоцтвы па скасаванні крэдытных дамоваў з грамадзянамі, якія не выконваюць свае абавязацельствы.

Акрамя таго, ва ўказ N13 унесеныя карэктывы, паводле якіх льготныя крэдыты і аднаразовыя субсідыі могуць прадастаўляцца на будаўніцтва або рэканструкцыю жылых памяшканняў, размешчаных у эканамічных жылых дамах тыпавых уласцівасцяў, пералік праектаў якіх зацверджаны Мінбудархітэктуры, а таксама на будаўніцтва або рэканструкцыю аднакватэрных жылых дамоў або набыццё жылых памяшканняў.

Таксама ва ўказ N13 унесеныя змены ў частцы ўмоў і парадку прадастаўлення льготных крэдытаў і аднаразовых субсідый грамадзянам, якія набываюць жылыя памяшканні, пабудаваныя па дзяржаўнай замове. Павінна быць забяспечанае ўзаемадзеянне мясцовых органаў улады з «Беларусбанкам» па фармаванні спісаў грамадзян, якія набываюць жылыя памяшканні, пабудаваныя па дзяржзамове з выкарыстаннем крэдытаў.

Акрамя таго, удасканальваецца парадак разліку сумы фінансавай дапамогі на пагашэнне запазычанасці па льготных крэдытах (без уліку запазычанасці, якая падлягае пагашэнню за кошт раней прадстаўленай аднаразовай субсідыі).