Паветкін патрабуе дыскваліфікаваць рэферы бою з Клічко

Каманда расейца Аляксандра Паветкіна накіруе вядучым баксёрскім арганізацыям пратэст з нагоды судзейства бою Паветкіна з украінцам Уладзімірам Клічко.

Пра гэта паведамляе ІТАР-ТАСС. Па словах Дзмітрыя Іванова, які прадстаўляе інтарэсы Паветкіна, пуэртарыканскі рэферы Луіс Пабон, які абслугоўваў паядынак, павінен быць адхілены ад працы як мінімум на год.

Іваноў падкрэсліў, што перад цэрымоніяй узважвання прадстаўнікі Паветкіна мелі зносіны з Пабонам, паказваючы яму на тое, што Клічко прымяняе забароненыя захопы і ўдары. Аднак падчас бою рэферы, па словах Іванова, «ігнараваў рэкамендацыі» расейцаў і дазваляў украінскаму баксёру парушаць правілы.

Іваноў таксама выказаў меркаванне, што падчас паядынку Пабон залічваў Паветкіну накдаўны, якіх на самой справе не было. Колькі менавіта накдаўнаў, на думку боку Паветкіна, былі зафіксаваныя несправядліва, Іваноў не ўдакладніў.

Паядынак Паветкіна з Клічко адбыўся 5 кастрычніка ў маскоўскім спорткомплексе «Алімпійскі». Па выніках 12 раўндаў усе трое суддзяў зафіксавалі перамогу Клічко па ачках з лікам 119:104.

Па ходзе паядынку Пабон чатыры разы залічваў Паветкіну накдаўн (адзін раз у другім раўндзе і тройчы - у сёмым раундзе). Пры гэтым у сёмым раундзе сам Паветкін двойчы паказваў, што яго падзенні не выкліканыя ўдарамі Клічко. У той жа час, двойчы (у дзевятым і адзінаццатым раўндзе) пасля падзенняў Паветкіна Пабон накдаўн не фіксаваў.

Клічко падчас бою часта ўваходзіў у клінч з Паветкіным, стараючыся не баксаваць з расейцам на сярэдняй і блізкай дыстанцыі. Пры гэтым Клічко фактычна навальваўся на суперніка, аднак Пабон не выносіз украінцу папярэджанняў і не штрафаваў яго. У 11-м Клічко штурхнуў Паветкіна, і Пабон пакараў украінскага баксёра здыманнем аднаго ачка.

Перамогшы Паветкіна, Клічко-малодшы абараніў тытул «суперчэмпіёна» па версіі WBA (Сусветная баксёрская асацыяцыя), а таксама чэмпіёнскія тытулы IBF (Міжнародная федэрацыя бокса) і WBO (Сусветная баксёрская арганізацыя).

Дзмітрый Іваноў стаў займацца справамі Паветкіна ў перыяд яго падрыхтоўкі да бою з Клічко. Па словах прамоўтэра Андрэя Рабінскага, Іваноў займаўся «арганізацыйнымі пытаннямі». Да гэтага шмат гадоў мэнэджэрам Паветкіна быў Уладзімір Хруноў, аднак за некалькі месяцаў да паядынку з Клічко расейскі баксёр спыніў супрацоўніцтва з гэтым спецыялістам.

Фота: Reuters