Барыс Грэбеншчыкоў: Альтэрнатыва павінна быць заўсёды

Легендарны расейскі рок-музыка пракаментаваў «чорныя спісы» музыкаў у Беларусі.

«Чорныя спісы» існуюць паўсюдна. Пра гэта заявіў легендарны расейскі рок-музыка, радыёжурналіст, лідэр гурта «Акварыум» Барыс Грэбеншчыкоў 18 лютага на прэс-канферэнцыі ў Менску, адказваючы на пытанне, ці ведае ён пра існаванне ў Беларусі чорных спісаў музыкаў, чые выступленні знаходзяцца пад негалоснай забаронай з-за іх грамадзянскай пазіцыі, піша БелаПАН.

«Як чалавек, які быў досыць доўгі час на чале нашага (расейскага - БелаПАН.) чорнага спісу, хачу сказаць, што такія спісы існуюць усюды, па розных прычынах - палітычных ці эканамічных, нейкіх іншых», - адзначыў Грэбеншчыкоў.

Пры гэтым ён лічыць, што музыка, які пачынае праяўляць палітычную актыўнасць, «перастае быць творцам». Музыкі павінны быць «ад усіх», а не толькі «ад нейкай часткі» народа, перакананы Грэбеншчыкоў.

«Як толькі музыка становіцца палітычнай жывёлай, ён губляе свой першапачатковы сэнс творцы, паколькі творца не можа быць грамадзянінам якой-небудзь дзяржавы або сябрам нейкай партыі, належаць да той ці іншай тэрарыстычнай групоўкі», - мяркуе лідэр «Акварыума».

Па словах Грэбеншчыкова, у яго няма ніякай грамадзянскай пазіцыі. «Я за ўсіх людзей, а значыць, супраць любога ўрада», - падкрэсліў ён і запляскаў журналістцы, якая заўважыла, што такое стаўленне прыводзіць да ўзнікнення анархіі.

«Такіх, як я, не так шмат, людзі звычайна аддаюць перавагу хадзіць статкам, - упэўнены лідэр «Акварыума». - А мы для таго, каб даць альтэрнатыву тым нямногім, якія гэтага не хочуць. Альтэрнатыва павінна быць заўсёды».

На пытанне пра нізкапробныя музычныя прыхільнасці сучаснага чалавека Грэбеншчыкоў адказаў, што не трэба «прабіваць сцяну», якая абмяжоўвае культурныя перавагі кожнага чалавека. «Разумны чалавек яе (сцяну) абміне, - лічыць музыкант. - Людзі без сцяны не могуць, яны не хочуць. Колькі людзей ні цягні да свабоды жалезнай рукой, яны будуць адбівацца, плакаць і біцца. Свабода для тых, хто яе хоча, заўсёды у любога чалавека ёсць магчымасць удасканальвацца зыходзячы з гэтай свабоды».

Музыкі папрасілі расказаць, хто ж такі свабодны чалавек, і ён адказаў, што не можа даць вызначэння. «Вызначыць, значыць абмежаваць. Як можна абмежаваць свабоднага чалавека? Калі нельга абмежаваць, значыць нельга вызначыць. Я думаю, што гэта ўнутранае адчуванне», - рэзюмаваў Грэбеншчыкоў.

Частка вялікага калектыву «Акварыума» цяпер знаходзіцца ў адпачынку, у той час як чацвёра ўдзельнікаў групы, у тым ліку Грэбеншчыкоў, актыўна гастралююць па гарадах Расеі і замежжа. Так, музыкі з акустычнымі канцэртамі ўжо наведалі Гомель і Магілёў, а 18 лютага згуляюць у Менску.