Ва Украіне абезгаловілі помнікі Леніну і Крупскай
109- 25.02.2013, 11:52
У вёсцы Кастрычніцкае Палтаўскай вобласці Украіны невядомыя абезгаловілі помнікі Уладзіміру Леніну і яго жонцы Надзеі Крупскай.
Пра гэта паведаміў у Facebook прадстаўнік нацыяналістычнай партыі «Свабода» Аляксандр Аронец, піша lenta.ru.
Аронец, які ў «Свабодзе» адказвае за сувязі з грамадскасцю, апублікаваў фатаграфіі паламаных статуй. Паводле яго слоў, здымкі прыйшлі па электроннай пошце. Прадстаўнік партыі пахваліў «невядомых патрыётаў», нагадаўшы аб нядаўна знесеным нацыяналістамі помніку Леніну ў Ахтырцы (Сумская вобласць).
«Пайшла хваля, гэта ж выдатна!», - піша ён.
У абласным упраўленні міліцыі інфармацыю аб пашкоджанні помнікаў пацвердзілі. У цяперашні час вядуцца пошукі вінаватых.
Помнік Леніну ў Ахтырцы быў дэмантаваны 15 лютага. Гэтую акцыю ажыццявілі «свабодаўцы» на чале з дэпутатам Вярхоўнай Рады Ігарам Мірашнічэнкам. У сувязі з гэтым, як паведамляла «Украинская правда», міліцыя пачала расследаванне па артыкуле «Хуліганства».
Пазней, 23 лютага, у Ахтырцы адбыліся сутычкі паміж камуністамі і прадстаўнікамі «Свабоды», якія праводзілі акцыю супраць аднаўлення помніка.
На падзеі ў Сумскай вобласці адрэагаваў мэр Харкава Генадзь Кернес, які прадстаўляе кіруючую Партыю рэгіёнаў. Як перадае ТСН, ён заявіў, што гатовы асабіста аплаціць аднаўленне помніка ў Ахтырцы. Мэр таксама прыгразіў нацыяналістам, што калі яны паспрабуюць зламаць помнік Леніну, які стаіць у цэнтры Харкава, то ён (мэр) пераламае ім рукі і ногі.
Фота: ТСН