Мікіта Ліхавід: Захочуць пасадзіць - забяруць проста з дому
8- 25.02.2013, 18:08
«Калі давядзецца адседзець 10 сутак, я не буду хавацца», - заявіў у інтэрв'ю charter97.org былы палітвязень Мікіта Ліхавід.
«Падрабязнасці гэтай справы мне пакуль што не вядомыя. Заўтра я пайду ў суд для высвятлення абставінаў. У міліцыі мне паведамілі толькі тое, што паводле такіх спраў няма тэрміну даўніны. Таму я не здзіўлюся, калі праз 20 гадоў мяне папросяць адседзець гэтыя дні.
Адзначу, што такі выпадак тычыцца не толькі мяне, бо ўчастковы міліцыянт атрымаў 11 такіх пастаноў у нашым раёне. Гэта ўсяго толькі бюракратычныя працэдуры. Калі б быў намер мяне пасадзіць, то ўжо б даўно прыйшлі дадому і забралі. Ва ўсякім выпадку, 10 дзён - гэта не 10 гадоў», - падкрэсліў актывіст.
Нагадаем, міліцыя Першамайскага раёна Менска запатрабавала ад былога палітвязня Мікіты Ліхавіда адбыць 10 дзён адміністрацыйнага арышту за ўдзел у мітынгу 19 снежня 2010 года.
20 снежня 2010 Ліхавіда пакаралі за ўдзел у Плошчы 15 днямі арышту, але 25 снежня яго перавялі ў следчы ізалятар праз распачатую крымінальную справу, паводле якой ён быў асуджаны ўжо на 3,5 гады калоніі ўзмоцненага рэжыму. Датэрмінова Ліхавід быў вызвалены ў верасні 2011 года.
Фота: «Белсат»