Вёскі на Магілёўшчыне застаюцца ў снежным палоне
18- 18.03.2013, 16:31
На Магілёўшчыне ў Бялыніцкім раёне некаторыя пасёлкі застаюцца адарванымі ад свету, так як снегам замяло дарогі.
У некаторых вёсках дзеці з пятніцы не ходзяць у школу.
Горш сітуацыя ў маланаселеных вёсках, дзе жывуць пераважна старыя. Туды не можа даехаць аўталаўка з прадуктамі, перадае «Радыё Свабода».
У Семікоўцы жыве пятнаццаць чалавек. Адны старыя. Ад райцэнтра да паселішча - больш за дваццаць кіламетраў. Як сцвярджаюць жыхары, сяло начыста занесла.
«Ад снегу нас не расчысцілі. І не ведаем, калі расчысцяць. Я семдзесят з лішнім гадоў пражыла і такога снегу не памятаю. Усё ў нас заваліла. Можа будуць чакаць, пакуль сонца прыйдзе і ўсё растане», - кажа адна з жыхарак вёскі.
Яшчэ адна вёска Ігліца таксама ў снежным палоне.
«У нас таксама не чысцей. Дзеці з пятніцы ў школу не ходзяць. Дарогі не расчышчаныя. Аўтобус не прыйшоў сёння. Без хлеба сядзім. Мы тэлефанавалі, прасілі дапамогі, але яе пакуль няма. Да Заполля, дзе ў нас сельсавет, дзесяць кіламетраў. А да райцэнтра - 35 кіламетраў. Нам трэба ў Бялынічы выехаць, ды толькі як? - пытаецца жыхарка Ігліцы.
На Магілёўшчыне за два дні снежнага шторму «Хавера» выпала месячная норма ападкаў. Вышыня снежнага покрыва месцамі дасягала 60 сантыметраў. 264 паселішчы засталіся без электрычнасці.
Фота: РІА «Новости»