Дыпламатаў дапытаюць з нагоды фуршэтаў Варламава

11 красавіка на працэсе над мадэльерам Сашам Варламавым у якасці сведкі выступіў Аляксандр Казулін, сёння дапытаюць беларускіх дыпламатаў у замежных краінах.

На працэсе над мадэльерам Аляксандрам Варламавым 12 красавіка будуць апытаныя супрацоўнікі замежных пасольстваў Беларусі, паведамляе «Радыё Свабода».

Верагодна, як заявіў адвакат Павел Піваварчык, гэта будуць супрацоўнікі амбасадаў у Нямеччыне і Аўстрыі.

Паводле версіі следства, фуршэты на тэрыторыі замежных пасольстваў, у якіх удзельнічаў Аляксандр Варламаў, фінансаваліся за дзяржаўны кошт і былі арганізаваныя пасольствамі, у той час як Аляксандр Варламаў у сваіх паказаннях сцвярджае, што ён фінансаваў і арганізоўваў гэтыя фуршэты за свае сродкі.

Колькі ўсяго супрацоўнікаў пасольстваў будзе апытана, пакуль невядома.

У чацвер у судзе над Варламавым былі дапытаныя ў якасці сведак былыя рэктары БДУ Аляксандр Казулін і Васіль Стражаў. Большасць адказаў Казуліна на пытанні пракурора былі аднолькавыя: «Я не памятаю».

Нагадаем, дырэктар ПУП «Агенцтва моды Сашы Варламава», былы мастацкі кіраўнік Цэнтра сучаснага стылю і моды «UNIVERSUM MODELS» управы справамі культуры БДУ, былы намеснік старшыні арганізацыйнага камітэта рэспубліканскага фестывалю-конкурсу моды і фота «Млын моды» і начальнік Цэнтра маладзёжнай моды БДУ Варламаў быў узяты пад варту 20 траўня 2011 года.

Варламаву было выстаўленае канчатковае абвінавачанне ва ўчыненні злачынстваў, якія прадугледжваюць адказнасць за ўчыненае махлярства ў асабліва буйной суме (ч.4 арт.209 КК), крадзеж шляхам злоўжывання службовымі паўнамоцтвамі ў буйной суме (ч.3 арт.210), прысваенне маёмасці (ч. 2 ст.211), ухіленне ад выплаты падаткаў (ч.1 арт.243), злоўжыванне службовымі паўнамоцтвамі (ч.3 арт. 424).

У якасці сведак крымінальнай справе дапытана больш за 800 чалавек, пацярпелымі прызнаныя 353 асобы.

Паводле звестак следства, агулам матэрыяльная шкода, прычыненую злачыннымі дзеяннямі Варламава, склала больш за Br 1,2 млрд.