Генпракуратура РФ просіць выдаць дэбашыра Кабалава

Генпракуратура РФ накіравала ў Менск запыт на выдачу «авіяцыйнага дэбашыра» Сяргея Кабалава, які быў затрыманы ў Беларусі.

Запыт аб выдачы ў Менск накіраваў намеснік генеральнага пракурора РФ Аляксандр Звягінцаў на падставе Канвенцыі аб прававой дапамозе і прававых адносінах па грамадзянскіх, сямейных і крымінальных справах ад 1993 года.

Органамі следства Сяргей Кабалаў абвінавачваецца ў здзяйсненні злачынстваў, прадугледжаных ч.3 арт 30, п. «в» ч. 2 арт. 211 (замах на захоп паветранага судна ў мэтах згону, здзейснены з прымяненнем гвалту, небяспечнага для жыцця і здароўя, і з пагрозай прымянення такога гвалту), п. «а» ч. 2 арт 115 (наўмыснае прычыненне лёгкай шкоды здароўю, якое выклікала кароткачасовае расстройства здароўя, здзейсненае з хуліганскіх намераў) КК РФ, піша «Інтэрфакс».

Крымінальная справа ў дачыненні да Кабалава знаходзіцца ў вытворчасці Маскоўскага следчага аддзела на паветраным і водным транспарце СК Расеі.

Нагадаем, Кабалаў, абвешчаны ў міжнародны вышук пасля хуліганства на борце пасажырскага самалёта, які ляцеў з Масквы ў Хургаду, больш за месяц хаваўся на тэрыторыі Беларусі. Ён прыбыў на тэрыторыю Беларусі ў канцы студзеня з тэрыторыі Украіны і быў затрыманы 7 сакавіка супрацоўнікамі крымінальнага вышуку МУС і УУС Гродзенскай вобласці. У цяперашні час Кабалаў знаходзіцца ў СІЗА Гродна.