Жыхарка Баранавічаў выманіла ў банкаў крэдытаў на мільярд рублёў

Каб атрымаць крэдыты, уладальніца сеткі прыватных аптэк прадаставіла ў банк дакументы з ілжывымі звесткамі аб маёмасці, якая давалася ў заклад.

Магчыма, парушэнне і не заўважылі б, калі б жанчына не перастала плаціць па крэдытах, піша «Intex-press».

Гісторыя пачалася яшчэ ў 2010 годзе, калі жыхарка Баранавічаў - уладальніца сеткі прыватных аптэк - звярнулася ў адзін з буйных банкаў з просьбай прадаставіць ёй крэдыт на закупку тавару.

У якасці гарантыі сваёй плацежаздольнасці жанчына падала ў банк бухгалтарскія дакументы аб наяўнасці тавараў, якія знаходзіліся ў абароце і павінны былі паслужыць залогам.

З перыядычнасцю ў некалькі месяцаў жанчына атрымала ў гэтым банку пяць крэдытаў на агульную суму, якая перавышае мільярд рублёў. І спачатку яна спраўна па іх плаціла.

Калі ж жанчына перастала разлічвацца з банкам і ў яе ўтварылася шматмільённая запазычанасць, была праведзеная старанная праверка. Высветлілася, што дадзеныя ў бухгалтарскіх дакументах былі завышаныя, тавараў, якія павінны былі служыць залогам, на самай справе было значна менш, чым паказана ў бухгалтарскай справаздачнасці.

«Жанчына патлумачыла, што гандаль ішоў дрэнна, выручка была маленькай ці яе не было ўвогуле, таму яна і не змагла плаціць па крэдытах», - паведамілі ў фінансавай міліцыі.

На днях на гараджанку завялі крымінальную справу па ч. 2 арт. 237 КК РБ (выманьванне крэдыту або субсідыі), якая прадугледжвае максімальнае пакаранне ў выглядзе пазбаўлення волі на тэрмін ад 2 да 5 гадоў.