Шматстаночнік Пракаповіч

Віцэ-прэм'еру Пятру Пракаповічу даручана курыраваць стварэнне Віцебскай сіліконавай даліны.

Пра гэта гаворыцца ў пастанове Саўміна № 412 ад 22 траўня 2013 г., якая ўносіць змены ў дадатак да пастановы ўрада ад 11 верасня 2012 г. № 841 аб замацаванні высокапастаўленых чыноўнікаў за арганізацыямі і інвестыцыйнымі праектамі.

У дакуменце адзначаецца, што Віцебская сіліконавая даліна будзе ўключаць 4 складнікі: інкубатар малога прадпрымальніцтва; сіліконавую даліну - інавацыйны цэнтр; тэхнапарк; індустрыяльна-прамысловую зону. Рэалізацыя праекта прызначаная на 2013 - 2015 гады.

Акрамя Віцебскай сіліконавай даліны Пракаповічу даручана курыраваць ААТ «Камволь» і ААТ «Сукно».

Нагадаем, Пётр Пракаповіч быў прызначаны віцэ-прэм'ерам ў студзені 2013 года.

Раней Пракаповіч займаў пасаду кіраўніка Нацбанка, але быў звольнены 18 ліпеня 2011 года «ў сувязі з выхадам у адстаўку». За час яго банкірства рубель дэвальваваўся ў 2,8 разы, а інфляцыя ў Беларусі заставалася самай высокай на кантыненце.

На дадзены момант віцэ-прэм'ер займае больш 20 пасад.

Фота: bymedia.net