Жэтоны ў метро можна купіць па бескантактавых картках

У менскім метро цяпер можна купіць жэтоны і праязныя квіткі, выкарыстоўваючы бескантактавыя банкаўскія карткі.

Аплатныя тэрміналы з адпаведнымі функцыямі нядаўна паставіў «БПС-Ашчадбанк» у касах усіх станцый.

Пра гэта карэспандэнту агенцтва «Менск-Навіны» паведаміў намеснік начальніка службы руху КУП «Менскі метрапалітэн» Ігар Дадалка.

Раней у метро функцыянавалі прылады, падобныя тым, што размешчаныя на касах у крамах: каб з іх дапамогай аплаціць куплю або паслугу, трэба правесці карткай або ўставіць яе ў тэрмінал. Цяпер купіць жэтон ці праязны ў падземцы можна, толькі паднясучы банкаўскую картку да ПІН-паду, не аддаючы яе ў рукі касіра. Праўда, адзначаюць спецыялісты, у менчукоў бескантактавых банкаўскіх картак пакуль мала, у асноўным імі карыстаюцца замежныя грамадзяне, але паступова і жыхары сталіцы адчуюць перавагу падобнага варыянту аплаты праезду.

Наступны этап укаранення новых тэхналогій у метрапалітэне, па словах І. Дадалкі, дазволіць купляць жэтоны і праязныя з дапамогай мабільных тэлефонаў, аснашчаных спецыяльнай прыладай ці сім-карткай з чыпам.