Прадажнай суддзі выдалі ордэн

Лукашэнка ўзнагародзіў ордэнам Пашаны суддзю Вярхоўнага Суда Беларусі Валянціну Кулік, якая разглядала справу аб ліквідацыі праваабарончага цэнтра «Вясна».

Таксама Валянціна Кулік мела дачыненне да шэрагу іншых спраў, звязаных з апазіцыйнымі структурамі, паведамляе «Радыё Свабода».

Да прыкладу, у верасні 2012 суддзя Валянціна Кулік не задаволіла скаргу Аляксандра Мілінкевіча, які спрабаваў праз Вярхоўны суд дамагчыся, каб яго зарэгістравалі кандыдатам у «дэпутаты» «палаты прадстаўнікоў».

У 2010 годзе Вярхоўны суд адмовіў заснавальнікам партыі Беларуская Хрысціянская Дэмакратыя (БХД) у пазове супраць Міністэрства юстыцыі. Суддзя Валянціна Кулік абвясціла, што пастанова Мінюста аб нерэгістрацыі партыі была законная.

У 2008 годзе суддзя Валянціна Кулік абвясціла вердыкт на скаргу «Руху «За Свабоду», якому адмаўлялі ў рэгістрацыі. Яна заявіла, што міністэрства юстыцыі не парушала заканадаўства, калі адмовіла заяўнікам у рэгістрацыі.

У 2005 годзе Вярхоўны суд Беларусі палічыў законным афіцыйнае папярэджанне Мінюста ў адрас Незалежнага інстытута сацыяльна-эканамічных і палітычных даследаванняў. Справу таксама разглядала суддзя Кулік.