Уладзімір Парфяновіч: Бел-чырвона-белы сцяг павінен вісець у прэзідэнцкім кабінеце
10- 6.05.2013, 16:15
Нацыянальны беларускі сцяг быў забаронены на матчы Беларусь-Славенія па просьбе Федэрацыі хакея Беларусі, лічыць алімпійскі чэмпіён.
Уладзімір Парфяновіч і Сяргей Чухрай, двойчы алімпійскія чэмпіёны 1980 года, пракаментавалі «Радыё Свабода» забарону Міжнароднай хакейнай федэрацыі выкарыстоўваць бел-чырвона-белыя сцягі на матчах ЧС-2013.
«Як па мне, то бел-чырвона-белы сцяг павінен вісець у прэзідэнта ў кабінеце. Гэта наша хакейная федэрацыя ўсё зрабіла, выказала пратэст, і цяпер забаранілі», - сказаў Уладзімір Парфяновіч.
Уладзімір Парфяновіч лічыць, што пакуль няма магчымасці адмяніць рашэнне Міжнароднай хакейнай федэрацыі.
Сяргей Чухрай, партнёр Уладзіміра Парфяновіча, упэўнены, што нельга забараняць заўзятарам выкарыстоўваць бел-чырвона-белы сцяг на трыбунах.
«Ніхто не можа забараніць чалавеку выказваць сваё меркаванне: калі яму падабаецца бел-чырвона-белы сцяг, то хай ім махае. Не разумею, пры чым тут палітыка. Гэтыя заўзятары паказваюць сцяг той краіны, у якой яны жылі раней.
І я б мог падняць гэты сцяг, і гэта было б зразумела, бо ўсе свае рэгаліі я зарабіў пры той краіне. Гэта была мая краіна, я ў ёй пражыў 50 гадоў.
Мне не зразумелая рэакцыя тых, хто забараняе. Яны, напэўна, баяцца нават ценю той краіны», - сказаў спартсмен.
Нагадаем, учора на матчы Беларусь-Славенія, які праходзіў у Швецыі ў рамках Чэмпіянату свету па хакеі, за спробу развярнуць вялікі бел-чырвона-белы сцяг беларускім заўзятарам мясцовыя паліцэйскія выкруцілі рукі і вывелі іх з арэны.