Азярэц сышоў у прафсаюзы

Былы міністр энергетыкі Аляксандр Азярэц стаў прафсаюзным дзеячам.

Звольнены ўказам Лукашэнкі 18 красавіка 2013 года за правалы ў кіраванні энергетычнай галіной былы міністр энергетыкі Аляксандр Азярэц узначаліў аддзел аховы здароўя і бяспекі працы Беларускага прафсаюза работнікаў энергетыкі, паведамляе сайт praca-by.info.

Нагадаем, напярэдадні вызвалення ад пасады міністра прэзідэнт Лукашэнка рэзка раскрытыкаваў працу Мінэнерга. Ён заявіў, што вельмі незадаволены працай энергетычнага комплексу краіны і запатрабаваў дэталёва праверыць абгрунтаванасць фармавання тарыфаў на цяпло - і электраэнергію. Энергетыкі ў нас сфармавалі «дзяржаву ў дзяржаве», з элементамі мафіі і банды, сказаў тады Лукашэнка.

Падобныя абвінавачанні не перашкодзілі Беларускаму прафсаюзу работнікаў энергетыкі прыцягнуць былога міністра да справы абароны правоў працоўных. У прафсаюзе пацвердзілі, што Аляксандр Азярэц узначаліў аддзел аховы здароўя і бяспекі працы прафсаюза.

Кіраўнік юрыдычнай службы прафсаюза РЭП Жанна Запрыварына лічыць, што гэта рашэнне не толькі ненатуральнае па сваёй сутнасці, але і парушае правілы самой жа Федэрацыі, паколькі нельга заняць пасаду галоўнага тэхнічнага інспектара, не папрацаваўшы шараговым тэхнічным інспектарам.

- Пастановай Прэзідыума Федэрацыі прафсаюзаў Беларусі 25 жніўня 2010 года зацверджанае палажэнне аб тэхнічнай інспекцыі працы ФПБ, згодна з якім галоўнымі тэхнічнымі інспектарамі працы могуць быць асобы з вышэйшай тэхнічнай адукацыяй і стажам працы на пасадзе тэхнічнага інспектара працы ці інспектара па ахове працы не менш трох гадоў, - патлумачыла прафсаюзны юрыст, дадаўшы, што ў адпаведнасці з пунктам 8 дадзенага палажэння тэхнічны інспектар прызначаецца на пасаду па ўзгадненні з тэхнічнай інспекцыяй працы Савета ФПБ з наступным сцвярджэннем Прэзідыумам Савета ФПБ.

- Гэта значыць, Федэрацыя прафсаюзаў Беларусі не павінна была прапусціць на пасаду галоўнага тэхнічнага інспектара чалавека без стажу работы на пасадзе тэхнічнага інспектара працы ці інспектара па ахове працы. А ў паслужным спісе Азярца няма ўказання на тое, што ў яго ёсць вопыт такой працы, - падагульніла Жанна Запрыварына.

Старшыня прафсаюза РЭП Генадзь Фядыніч нагадаў, што ў савецкія часы цэкаўскіх дзеячаў, якія не спраўляліся з працай, таксама адпраўлялі ў прафсаюз.

- Гісторыя паўтараецца, - сказаў прафсаюзны лідар. - Да гэтага часу такіх выпадкаў яшчэ не было, каб былы міністр стаў галоўным тэхнічным інспектарам прафсаюза. У сувязі з гэтым у мяне пытанне да ўсіх работнікаў энергетыкі: вам такі прафсаюз патрэбны? Для чаго вы плаціце ўнёскі? Вас абароніць былы міністр, які не хацеў падпісваць з вамі тарыфнае пагадненне?