Дарэнку ўручылі позву ў суд у прамым эфіры

Вядомы журналіст быў некалькі здзіўлены, калі ўбачыў супрацоўніка паліцыі ў студыі.

Сяргей Дарэнка выкліканы ў суд па пазове кіраўніка РЖД Уладзіміра Якуніна аб абароне гонару і годнасці, паведамляе «Эхо Москвы». Супрацоўнік паліцыі ўручыў яму позву прама ў студыі «Рускай службы навін» (РСН), дзе ён вёў ранішні эфір.

Вядомага журналіста, які нядаўна набыў кватэру ў цэнтры Менска і неаднаразова расхвальваў Лукашэнку, абвясціў у вышук Харошаўскі суд Масквы 28 траўня.

Праваахоўным органам было даручана знайсці Дарэнку і ўручыць позву з патрабаваннем з'явіцца ў якасці адказчыка па пазове кіраўніка РЖД.

Па словах адваката пазоўніка, Сяргей Дарэнка, абвінаваціўшы Уладзіміра Якуніна ў некалькіх супрацьпраўных дзеяннях, па невядомай прычыне, ухіляецца ад наведвання судовых пасяджэнняў.

Паводле пазову, 14 лістапада 2012 года ў праграме «Пад'ём» на радыё РСН вядучы Сяргей Дарэнка сваімі выказваннямі зганьбіў гонар і дзелавую рэпутацыю кіраўніка РЖД. У сувязі з гэтым Уладзімір Якунін патрабуе кампенсацыю ў памеры 80 тысяч рублёў. Адказчыкамі з'яўляюцца Сяргей Дарэнка і заснавальнік РСН - ТАА «Кантынент».

Фота: Сяргей Шахіджанян