«Ліпавы» Герой Расеі выступаў у Віцебску на асвячэнні крыжа
46- 22.07.2013, 10:32
- 36,218
Падроблены Герой Расеі выступіў у Віцебску на асвячэнні паклоннага крыжа ў гонар беларусаў, якія змагаліся ў Крымскай вайне.
21 ліпеня ў Віцебску ўрачыста асвяцілі паклонны крыж у гонар маракоў-беларусаў, якія змагаліся ў Крымскай вайне 1853-1856 гадоў.
Ён павінен быць усталяваны ў Севастопалі 28 ліпеня ў рамках акцыі «Флот памятае ўсіх, а значыць і мяне», пішуць «Народныя навіны Віцебска».
Васьміканцовы крыж зроблены з дрэва, каванымі лічбамі на ім выкладзеныя даты пачатку і заканчэння аблогі Севастопаля і яе працягласць у днях.
Урачыстасці адбыліся каля ўваходу ў самы вялікі праваслаўны храм Віцебска - Свята-Успенскі сабор. Узначаліў чын асвячэння крыжа архіепіскап Віцебскі і Аршанскі Зміцер.
У сваім выступленні аўтар і каардынатар расейска-беларускага праекта «Марское братэрства - непарушнае!», віцэ-прэзідэнт Міжнароднага фонду ваенна-гістарычнай спадчыны Арсеній Крыцкі адзначыў, што гэты памятны знак беларускім маракам будзе ўсталяваны ў Севастопалі па рашэнні камандуючага Чарнаморскім флотам ВМФ Расеі віцэ-адмірала Аляксандра Вітко, які з'яўляецца выхадцам з Віцебска. У Крымскай вайне прымалі ўдзел Беластоцкі, Брэсцкі, Віленскі, Віцебскі, Менскі, Магілёўскі і Полацкі палкі, праўда, усе яны былі пяхотнымі.
Услед за Арсеніем Крыцкім выступіў нехта, каго вядучы прадставіў генерал-маёрам марской пяхоты Героем Расеі Уладзімірам Пяшкуном. Увагу карэспандэнта «ННВ» прыцягнула дзіўная калодка медалі залатой зоркі - замест трох палос колера расейскага сцяга яе муаровая стужка мела лішнюю белую паласу. Пры разглядзе фотаздымкаў на кампутары выявілася, што і на самай зорцы нанесены нейкі рэльефны малюнак, чаго быць не павінна.
У базе дадзеных Герояў Расейскай Федэрацыі Уладзіміра Пяшкуна не аказалася, а «Вікіпедыя» паведамляе, што сярод марскіх пяхотнікаў гэтай узнагароды ганараваныя толькі два генерал-маёра - Яўген Качашкоў і Аляксандр Атракоўскі. Зрэшты, ці мае наш «герой» званне генерал-маёра цяпер таксама пытанне. А Віцебск можна павіншаваць з чарговым візітам чарговага паслядоўніка Астапа Бэндэра. Дарэчы, падобныя «грамадскія ўзнагароды» цяпер вельмі папулярныя ў Расеі і, заплаціўшы пэўную суму, можна стаць, напрыклад кавалерам ордэна «Залатая Зорка» Сусветнай Акадэміі Навук Комплекснай Бяспекі.