Расея ўвяла каранцін на мяжы з Беларуссю
21- 9.07.2013, 15:32
- 21,996
Упраўленне МНС Расеі па Смаленскай вобласці выставіла каранцінныя пасты на мяжы з Беларуссю.
Гэтыя меры прымаюцца для барацьбы з распаўсюджваннем афрыканскай чумы свіней, якая раней была зафіксаваная ў некалькіх раёнах нашай краіны. Каранцінныя пасты пачалі сваю працу сёння з 14 гадзін, паведамляе прэс-служба галоўнага ўпраўлення МНС Расеі па Смаленскай вобласці.
Павышаныя меры кантролю ўведзеныя «ў месцах перасячэння дзяржаўнай мяжы Расейскай Федэрацыі і Рэспублікі Беларусь каля населеных пунктаў: Сянькова, Ржаўка, Селуянава, Заазер'е. На іх будзе арганізаванае дзяжурства пажарных разлікаў Федэральнай супрацьпажарнай службы Смаленскай вобласці і абласнога пажарна-выратавальнага цэнтра», гаворыцца ў паведамленні.
Нагадаем, 5 ліпеня ў Беларусі быў выяўлены другі ачаг афрыканскай чумы свіней (АЧС). Захворванне пацверджана ў Віцебскай вобласці. Першы ачаг быў знойдзены ў Гродзенскай вобласці. Вынікі расследавання па факце заносу віруса паказалі, па паведамленнях уладаў, што захворванне занесенае з кармамі для жывёл, увезенымі з тэрыторыі Расеі.
Першая інфармацыя пра масавы падзеж свіней у Беларусі з'явілася яшчэ ў канцы красавіка, аднак улады адмаўлялі яе.