Больш тысячы чалавек патрабуюць вызваліць ксяндза Лазара
18- 13.08.2013, 15:36
- 11,380
БХД перадала ў КДБ і Генпракуратуру петыцыю за вызваленне ксяндза Уладзіслава Лазара.
Аргкамітэт па стварэнні партыі «Беларуская хрысціянская дэмакратыя» 13 жніўня пераслаў у КДБ і Генеральную пракуратуру Беларусі петыцыю за тэрміновае вызваленне святара, настаяцеля прыходу Сашэсця Святога Духа ў Барысаве Уладзіслава Лазара.
Петыцыю, створаную 1 жніўня, за няпоўныя два тыдні падпісалі больш тысячы чалавек - 1066 на 13:00 13 жніўня, паведамляе прэс-служба БХД.
«У СІЗА КДБ больш за два месяцы знаходзіцца каталіцкі святар, настаяцель прыходу Сашэсця Святога Духа ў Барысаве Уладзіслаў Лазар. У чым яго абвінавачваюць незразумела, бо ўвесь гэты час, нягледзячы на патрабаванні грамадства і ажыятаж у СМІ, КДБ настойліва захоўвае маўчанне па гэтай справе.
Мы лічым, што арышт каталіцкага святара з'яўляецца спробай шантажу Каталіцкага Касцёла ў Беларусі і запалохвання беларускага грамадства. У сувязі з гэтым мы патрабуем неадкладнага вызвалення ксяндза Уладзіслава Лазара», - гаворыцца ў звароце.
Нагадаем, 26 ліпеня Лукашэнка заявіў пра затрыманне супрацоўніка беларускіх спецслужбаў, які працаваў на замежныя дзяржавы праз прадстаўнікоў каталіцкай царквы. Супрацоўнік спецслужбаў, удакладніў ён, «не толькі здаваў інфармацыю, але з-за яго дзейнасці пацярпелі людзі, якія працуюць за мяжой». Праз некаторы час стала вядома пра затрыманне ксяндза Уладзіслава Лазара.