У Беларусі затрыманы «каталіцкі шпіён»

Лукашэнка заявіў, што ў Беларусі затрыманы супрацоўнік спецслужбаў, які працаваў на замежныя дзяржавы.

«Мы нядаўна затрымалі аднаго са здраднікаў, які служыў у спецслужбах і які праз прадстаўнікоў каталіцкай царквы быў звязаны з замежнымі дзяржавамі», - адзначыў Лукашэнка журналістам у пятніцу ў Менску, піша «Інтэрфакс».

Дадзены супрацоўнік спецслужбаў, удакладніў кіраўнік, «не толькі здаваў інфармацыю, але з-за яго дзейнасці пацярпелі людзі, якія працуюць за мяжой». «Гэта здрада? Вядома, гэта здрада», - сказаў Лукашэнка.

Лукашэнка гатовы даць Сноўдэну палітычны прытулак

«А чаму з амерыканскага пункту гледжання Сноўдэна нельга абвінаваціць, як здрадніка. Таму тут не павінна быць двайных стандартаў», - сказаў ён.

«Бяда, раскруцілі гэтую тэму, і, напэўна, сёння кіраўніцтва Расеі не ведае, што з гэтым Сноўдэнам рабіць. Я б на месцы расейцаў асабліва не напружваўся, а падаў Сноўдэну палітычны прытулак», - заявіў Лукашэнка.

Такую пазіцыю Лукашэнка патлумачыў тым, што Амерыка прытуліла сотні расейскіх здраднікаў. «Колькім яны людзям там далі прытулак, колькі забралі адсюль сакрэтаў, колькі тэрарыстаў, якіх Расея патрабуе выдаць, у сябе прытулілі і не выдаюць», - заўважыў ён.

«Што ж вы Пуціну прад'яўляеце прэтэнзіі, што ён сябе нібыта няправільна паводзіць. Правільна паводзіць. Даўно трэба было прадаставіць палітычны прытулак. Тады б вы ведалі, што свет глабальны, узаемазалежны, і калі тэрарыст у Расеі, то заўтра ён нешта ўчыніць ў Амерыцы. Нядаўна факты такія былі. Таму на месцы расейскага кіраўніцтва я б дзейнічаў больш рашуча ў гэтым плане, і гэта было б апраўдана», - сказаў Лукашэнка.

«АЧС прыйшла ад суседзяў»

Беларускі кіраўнік заявіў, што ўлады прынялі ўсе неабходныя меры па нераспаўсюджванні афрыканскай чумы свіней, і не бачыць тут «ніякай катастрофы».

«Гэта бяда прыйшла да нас з боку. Я не хачу нікога тут абвінавачваць, вы ведаеце, што адбываецца ў нашых суседзяў. Гэта сведчыць пра тое, што свет вельмі ўзаемаўвязаны, і нам прыйдзецца з гэтым (з АЧС) змагацца. Я не бачу тут ніякай катастрофы, як гэта звычайна раскручваецца», - заявіў Лукашэнка журналістам.

Ён сказаў, што «ачагі дакладна вызначаныя, еўрапейцы прызналі: трэба вучыцца ў беларусаў, як змагацца з гэтай заразай». «Нават Захад нас ставіць у прыклад іншым», - канстатаваў кіраўнік.

Лукашэнка паведаміў пра тое, што рэкамендаваў ураду працаваць з насельніцтвам і растлумачыць яму неабходнасць забою свіней у пэўных раёнах краіны. «Мы цяпер працуем з насельніцтвам, каб лакалізаваць гэтыя ачагі, працуем па дзікіх жывёлах, якія да нас мігруюць», - адзначыў кіраўнік. «Што тычыцца камбікармоў, то трэба карміць сваім кормам і акуратна правяраць дадаткі», - растлумачыў ён.

Пры гэтым Лукашэнка падкрэсліў, што «калі жывёла заражаная, яна ніяк не можа трапіць на мясакамбінат».

Адзначыўшы, што АЧС абсалютна бяспечная для людзей, ён заявіў, што «не трэба рабіць тут ніякай катастрофы, але трэба эфектыўна змагацца супраць гэтай заразы».

У размове з журналістамі Лукашэнка паведаміў, што ён рэдка ўжывае свініну, аддаючы перавагу кураціне і ялавічыне. «Але часам і свініну ўжываю, і не трэба думаць, што ў прэзідэнта куча людзей правяраюць ежу. Мы так жа, як і вы, на Камароўцы асобныя прадукты закупляем», - сказаў Лукашэнка. «Не перажывайце: елі шашлык са свініны і ешце», - параіў ён.

Будаўнічую галіну прывядуць у прытомнасць «карнымі мерамі»

Лукашэнка таксама паабяцаў «прывесці ў прытомнасць» будаўнічую галіну, у тым ліку карнымі мерамі.

Беларускі кіраўнік заявіў, што ўлады будуць весці бязлітасную барацьбу з карупцыяй у будаўнічым комплексе, і выказаў упэўненасць у тым, што праблемы галіны будуць вырашаныя ў бліжэйшы час.

«Як мне далажылі, распачата каля 80 крымінальных спраў толькі ў гэтай сферы. Мы пройдземся тут гусеніцамі самага цяжкага танка, пачынаючы ад чыноўнікаў УКБ-аў, праекціроўшчыкаў і будаўнікоў. Але мы выраўнуем гэта месца так, што народ да нас прэтэнзіі прад'яўляць не будзе», - адзначыў ён.

«У тым, што мы аздаравілі будаўнічую галіну, няма ніякіх сумненняў», - падкрэсліў ён.

Пры гэтым, адзначыў кіраўнік, «пытанне не ў тым, каб пасадзіць (людзей), а аздаравіць галіну». «Як бы хто хацеў, не хацеў, мы яе прывядзем ў прытомнасць і аздаравім», - падкрэсліў Лукашэнка, адзначыўшы, што ён абавязаны рэагаваць на скаргі людзей і грамадскую думку. «Думаю, многія ўжо зразумелі, што жартаваць мы ні з кім не маем намеру», - сказаў ён.

«Хачу, каб адказныя людзі гэта пачулі ў чарговы раз, асабліва прыватныя структуры», - адзначыў Лукашэнка. «Яны (прыватнікі) павінны разумець, што ўжо зарабілі свой адмоўны імідж, і мы ўсё больш будзем адмаўляцца ад прыватных забудоўшчыкаў», - дадаў ён. Пры гэтым ён растлумачыў, што прыватныя кампаніі атрымаюць магчымасць працаваць толькі ў тым выпадку, калі дакажуць сваю заможнасць як будаўнічыя арганізацыі.

«Мы будзем прымяняць карныя меры, каб людзі на нас не крыўдзіліся», - заявіў ён.

«Дзякуй Кітаю за тэхнапарк»

Лукашэнка ўскладае вялікія надзеі на праект па стварэнні Кітайска-беларускага індустрыяльнага парку, выказваючы падзяку кіраўніцтву КНР за яго падтрымку.

«Шмат жадаючых было на гэты тэхнапарк - украінцы, расейцы, але кітайцы прынялі рашэнне працаваць з намі. Таму нам трэба дзякаваць, што кітайскі бок выбраў для будаўніцтва нашу краіну», - заявіў Лукашэнка.

Ён лічыць стварэнне Кітайска-беларускага тэхнапарку адным з найважнейшых сумесных праектаў рэспублікі і КНР, «дзе будуць сканцэнтраваныя прадпрыемствы з усяго свету, самыя высокатэхналагічныя прадпрыемствы». «Нам «адвёртка» не патрэбная, мы хочам, каб да нас прыйшлі з высокатэхналагічным прадуктам, якім мы будзем гандляваць з Еўропай і Амерыкай», - сказаў ён.

Лукашэнка высока ацаніў пазіцыю старшыні КНР Сі Цзіньпіна, які заявіў: «Мы гатовыя распрацоўваць, праектаваць, ствараць і прадаваць тавар». Гэта значыць, патлумачыў Лукашэнка, «гаворка ідзе пра поўны цыкл вытворчасці высокатэхналагічнай прадукцыі ў беларуска-кітайскім тэхнапарку».

«Спецыялісты прагназуюць, што гэта будзе прадукт на $50 млрд, які пойдзе на экспарт. Тады ў нас не будзе ніякіх праблем з валютай», - сказаў Лукашэнка.

Гаворачы пра крытыку з боку некаторых прадстаўнікоў беларускай грамадскасці з нагоды будаўніцтва тэхнапарку, ён падкрэсліў, што «сваіх людзей мы не пакрыўдзім». «Калі хтосьці не захоча суседнічаць, то мы дамо яму зямлю ў самым лепшым месцы», - сказаў ён.