Пасажыраў цягніка «Менск-Варшава» выклікаюць ва УБАЗ
12- 10.09.2013, 12:10
- 30,154
Ва ўпраўленні па барацьбе з арганізаванай злачыннасцю шукаюць пасажыраў, якія куплялі квіткі на цягнік у праваднікоў.
Пра гэта ў «Фэйсбуку» паведаміла журналістка Крысціна Карчэўская.
«Выклікалі на допыт ва ўпраўленне па барацьбе з арганізаванай злачыннасцю. Толькі не смейцеся: з-за таго, што я часта ездзіла на цягніку «Менск - Варшава». Са мной у спісе заўважыла знаёмыя прозвішчы. Дык вось: шукаюць тых, хто купляў квіткі ў праваднікоў. Такія разнарадкі сышлі на кожную вобласць. Таму рыхтуйцеся», - напісала журналістка.
Нагадаем, у жніўні 2012 года ў Брэсце былі затрыманыя начальнік і праваднік цягніка «Менск - Варшава», а таксама 10 пасажыраў чацвёртага вагона. Прычынай затрымання паслужыла інфармацыя аб правозе безбілетнікаў.
З «зайцоў» узялі тлумачэнні і адпусцілі. А ў начальніка цягніка і правадніка выявілі амаль 500 даляраў і 30 еўра, якія тыя сабралі з пасажыраў. Іх падазраюць у крадзяжы шляхам злоўжывання службовымі паўнамоцтвамі, здзейсненым паўторна або групай асоб па папярэдняй змове.