На «левым» паліве ездзіць уся Еўропа

Чорны рынак паліва «залівае» Еўразвяз. Аўтамабілісты Польшчы, Вялікабрытаніі, Чэхіі, Ірландыі запраўляюцца нелегальнай саляркай.

Шкода вылічваецца мільёнамі еўра. Розніца ў коштах на паліва і скачок з 2009 года раздробнага гандлю саляркі на 52% - асноўныя прычыны росту махлярства. Правёўшы расследаванне, агенцтва фінансава-эканамічных навін Bloomberg устанавіла: кантрабанда «паўзе» з прымежных раёнаў, дзе асабліва моцна адчувальнае розніца ў кошце. У Беларусі і Расеі сярэдні кошт літра дызельнага паліва 0,71 еўра, у Польшчы за салярку папросяць 1,3 еўра, а ў Літве - 1,34 еўра, піша «Ежедневник».

Спосабы незаконнага вывазу паліва за мяжу для яго наступнага продажу добра вядомыя грамадзянам Беларусі. Памятаюць і аб стыхійных мітынгах «палівавозаў» пасля абмежаванняў Саўміна ўзору 2011 года. Вось толькі, калі меркаваць са звестак, апублікаваных рознымі краінамі, складваецца ўражанне, што або забароны кемлівыя суграмадзяне прымудраюцца нейкім бокам абыходзіць, або крадзеж ідзе не каністрамі, а цыстэрнамі, а то і складамі.

Паводле інфармацыі Bloomberg, бюджэт Польшчы недаатрымлівае праз махлярства з палівам амаль 100 млн еўра ў год, Вялікабрытаніі - 1,3 млрд. Кіраўнікі васьмі з дзесяці нафтаперапрацоўчых прадпрыемстваў запэўніваюць: прыбытак іх кампаній падае менавіта праз чорны рынак бензіну і саляркі.

Са слоў старшыні Ірландскай асацыяцыі нафтавай прамысловасці Тома Нунана, махлярства з палівам «падрывае сітуацыю ў нафтаперапрацоўчай прамысловасці і шкодзіць дзяржаве ў той час, калі эканамічныя праблемы ніколі не былі такія вялікія». У 2008-2009 гадах праз ценявыя аперацыі на паліўным рынку Вялікабрытаніі прычыненая шкода на 1,1 млрд фунтаў стэрлінгаў (1,7 млрд даляраў), у Грэцыі нелегальны рынак паліва расце прыкладна на 600 млн еўра ў год. Урад Чэхіі аб'явіў: як мінімум 20% спажыванага ў краіне паліва паступіла на продаж нелегальна.

Са слоў старшыні прававога камітэта Асацыяцыі маладых прадпрымальнікаў Расеі Сяргея Варламава, пададзеных expert.ru, «ашуканскія дзеянні магчымыя праз слабую ступень абароны нафтаправодаў і кантролю над расходам паліва. Гэтым карыстаюцца як злачынцы, так і спажыўцы нафтапрадуктаў, якім ашуканцы пастаўляюць тавар з вялікай зніжкай. Махінатараў цяжка прыцягнуць да адказнасці, бо іх цяжка злавіць. Нельга забываць таксама, што ценявы сектар развіваецца шмат у чым дзякуючы карупцыйным сувязям паміж злачынцамі і праваахоўнай сістэмай».