Лукашэнка заклікае яшчэ больш кітайцаў
67- 5.09.2013, 12:39
- 37,863
Беларускі кіраўнік прапанаваў Кітаю стварыць у рэспубліцы буйны кітайскі медыяхолдынг.
«Спектр нашых адносінаў вельмі шырокі. Мы былі б зацікаўленыя, каб Кітайская Народная Рэспубліка стварыла тут, у цэнтры Еўропы, магутны кітайскі медыяхолдынг, які зможа працаваць на Еўропу і на постсавецкую прастору», - заявіў Лукашэнка, сустракаючыся ў чацвер у Менску з членам Пастаяннага камітэта палітбюро ЦК кампартыі Кітая Лю Юньшаням, піша «Інтэрфакс».
Ён таксама адзначыў, што ў выпадку рэалізацыі гэтага праекта кітайскі медыяхолдынг зможа «больш актыўна працаваць на прасоўванне нашага супрацоўніцтва, каб у Кітаі больш ведалі пра нашыя сумесныя ініцыятывы».
Лукашэнка таксама пацвердзіў «зацікаўленасць у рэалізацыі сумесных беларуска-кітайскіх праектаў і прыцягненні ў беларускую эканоміку прамых інвестыцый з Кітая».
«Мы будзем вельмі зацікаўленыя, каб Кітай ажыццяўляў прамыя інвестыцыі ў Беларусь, і мы будзем ствараць для гэтага неабходныя ўмовы», - заявіў Лукашэнка.
Як адзначыў Лукашэнка, «у апошнія гады і нават месяцы мы прынялі шэраг беспрэцэдэнтных рашэнняў». У прыватнасці, удакладніў кіраўнік, «гэта датычыцца нашых сумесных праектаў, якія фінансуюцца і крэдытуюцца кітайскім бокам».
У гэтай сувязі Лукашэнка нагадаў пра праект па будаўніцтве беларуска-кітайскага індустрыяльнага парку, на прадпрыемствах якога будуць укаранёныя самыя высокія тэхналогіі.
Нагадаем, раней паведамлялася, што кітайска-беларускі тэхнапарк пад Менскам будуць будаваць 650 тысяч кітайцаў, якім ужо аформленыя працоўныя візы.