Анджэй Пачобут: Кітайцы не дадуць грошай на лукашэнкаўскі агітпроп
2- 5.09.2013, 16:23
- 20,216
Спробы беларускага кіраўніка выбіць з Кітая грошы на прапаганду дарэмныя.
Такім чынам гродзенскі журналіст, карэспандэнт «Gazety Wyborczej» Анджэй Пачобут пракаментаваў сайту charter97.org прапанову беларускага кіраўніка Кітаю стварыць магутны медыяхолдынг.
«З-за адсутнасці ў рэжыму Лукашэнкі грошай паўсталі праблемы з прапагандай. А ідэя з аб'яднаннем дзяржаўных газет буксуе і разбіваецца аб амбіцыі непасрэдных работнікаў прапаганды, якія прывыклі быць галоўнымі рэдактарамі, займаць высокія пасады. Цяпер іх хочуць фактычна загнаць у адзін калгас, а гэта значыць, што пасадаў і грошай будзе менш», - адзначыў журналіст.
Ён падкрэсліў, што на стварэнне медыяхолдынга патрэбныя грошы, і першыя, да каго можа звярнуцца ў такой сітуацыі Лукашэнка, гэта Кітай.
«Але я не чуў, каб кітайцы стваралі паспяховыя СМІ, арыентаваныя на еўрапейскі рынак. Таму думаю, што гэта проста жаданне Лукашэнкі атрымаць грошы, каб карміць свой агітпроп. Наогул, медыяхолдынг - гэта аб'яднанне некалькіх медыярэсурсаў. І калі казаць пра нармальную краіну, то зразумела, што там ёсць людзі, якія ствараюць, выкупляюць і інвестуюць грошы ў сродкі масавай інфармацыі. Але Лукашэнку не цікавіць нармальны медыярынак, дзе шмат пунктаў гледжання, а СМІ канкуруюць паміж сабой і незалежныя ад улады. Яго цікавіць варыянт, калі ўлада захоўвае абсалютны кантроль над СМІ, і Кітай тут з'яўляецца прыкладам, да якога імкнецца Лукашэнка. Але спробы выцягнуць з кітайцаў грошы мне здаюцца дарэмнымі», - лічыць Анджэй Пачобут.
Нагадаем, беларускі дыктатар прапанаваў Кітаю стварыць у Беларусі буйны медыяхолдынг.