Менчукі бягуць з прамысловасці ў сферу паслуг

Колькасць менчукоў, якія занятыя ў эканоміцы горада, у красавіку ў чарговы раз скарацілася. Часцей за ўсё менчукі звальняліся з прамысловых прадпрыемстваў.

Беспрацоўных, аднак, больш не стала. «Інтэрфакс» вывучыў падрабязнасці «эканамічнага цуду».

Як паведамляе Галоўнае статыстычнае ўпраўленне горада Менска, у эканоміцы сталіцы ў студзені-красавіку 2014 былі занятыя 1074000 чалавек - на 0,8% менш, чым у студзені - красавіку 2013 года. У той жа час, паводле звестак Міністэрства працы і сацыяльнай абароны РБ, колькасць беспрацоўных, зарэгістраваных у органах па працы, занятасці і сацыяльнай абароне, на канец красавіка склала 1,8 тыс. чалавек - на 2,9% менш, чым на канец красавіка 2013 года і на 2,2% менш, чым на канец сакавіка года цяперашняга.

Узровень зарэгістраванага беспрацоўя на канец красавіка склаў 0,2% ад эканамічна актыўнага насельніцтва - столькі ж, колькі і год таму.

Колькасць звольненых у Менску ў мінулым месяцы перавысіла колькасць прынятых работнікаў. Так, свежыя запісы ў працоўных кніжках у красавіку атрымалі 14,7 тысяч чалавек, у той час як запіс аб спыненні працоўных адносін з'явіўся ў 15,8 тысяч чалавек.

Не скажаш, што звальнялі і тут і там за розныя правіны. Толькі 5,2% ад страціўшых месца былі звольненыя за прагул і іншыя парушэнні працоўнай дысцыпліны. Зусім няшмат - 0,3% - вымушаныя былі сысці праз скарачэнне колькасці альбо штату работнікаў, альбо ліквідацыі арганізацыі. Такім чынам, пераважная большасць сталічных работнікаў наважыла змяніць працадаўцу паводле ўласнай ініцыятывы. Колькасць звольненых работнікаў арганізацый Менска перавысіла колькасць прынятых на 1100 чалавек.

Асабліва цікавыя суадносіны колькасці прынятых і звольненых работнікаў - менчукоў у залежнасці ад галін эканомікі. Горш за ўсё справы ідуць у прамысловасці: у красавіку былі прынятыя на працу 1995 чалавек, у тым ліку на новыя месцы - 136, а вось звольнена - 3339. Суадносіны прынятых і звольненых склалі 59,7%!

Напружаная сітуацыя з кадрамі і ў ахове здароўя і аказанні сацыяльных паслуг: суадносіны прынятых і звольненых - 66,9%. У адукацыі - толькі крыху лепш: 71,3%. У мінусе апынуліся таксама сфера вытворчасці і размеркавання электраэнергіі, газу і вады, транспарт і сувязь, апрацоўчая прамысловасць.

Куды сыходзілі звольненыя працаўнікі? На гэты конт дакладнай статыстыкі няма. Затое дакладна вядома, што больш прынятых, чым звольненых, у будаўніцтве, сферы гандлю і рамонтнага сэрвісу, у фінансавых арганізацыях, у сферы аказання камунальных, сацыяльных і персанальных паслуг, у арганізацыях сельскай гаспадаркі, палявання і лясной гаспадаркі.

Асабліва паказальныя вынікі гатэляў і рэстаранаў: у красавіку звольнена 560 чалавек, а прынятыя 888, у тым ліку 172 - на новыя месцы. Звязана гэта, вядома ж, з адкрыццём новых аб'ектаў размяшчэння ў сувязі з правядзеннем чэмпіянату свету па хакеі. Партал www.interfax.by абавязкова прасочыць, як будзе развівацца сітуацыя пасля таго, як запаўняльнасць гатэляў і грамадскага харчавання знізіцца пасля заканчэння ЧС-2014.

Агулам у Менску каэфіцыент замяшчэння работнікаў (суадносіны колькасці прынятых да ліку звольненых) у красавіку 2014 склаў 0,93. Выпадковасць гэта ці не, але, паводле звестак таго ж Галоўнага статыстычнага ўпраўлення горада Менска, намінальная налічаная сярэднямесячная заработная плата работнікаў у сталіцы ў красавіку паменшылася ў параўнанні з сакавіком на 1,5%.