МЗС РФ выявіла ў краінах Балтыі «наступ на расейскую мову»

Масква заявіла пра намер абараняць рускамоўных у краінах Балтыі ад уяўнага прыгнёту.

Упаўнаважаны МЗС Расеі ў пытаннях правоў чалавека, дэмакратыі і вяршэнства права Канстанцін Далгоў звярнуўся да міжнароднай супольнасці з просьбай абараніць правы расейскамоўнага насельніцтва ў Латвіі і Эстоніі. Пра гэта ён заявіў на рэгіянальнай канферэнцыі расейскіх суайчыннікаў Латвіі, Літвы і Эстоніі 13 верасня, паведамляе «Украінская праўда».

«Не будзем мірыцца з паўзучым наступам на расейскую мову, які мы назіраем у Прыбалтыцы. Разглядаем вядомыя крокі латвійскіх і эстонскіх уладаў, як накіраваныя на ўшчамленне статусу і палажэння расейскай мовы, як грубае парушэнне правоў чалавека», - заявіў Далгоў.

Ён заявіў, што ўважае за непрымальны той факт, што прадстаўнікі нацыянальных меншасцяў у краінах Балтыі не маюць магчымасці кантактаваць на роднай мове з уладамі, а таксама выкарыстоўваць родную мову ў тапаграфічных назвах.

«Больш за 50% насельніцтва, якое пражывае ў найбуйнейшых латвійскіх гарадах, па сваім этнічным складзе з'яўляецца расейскамоўным. Гэта - абуральны факт грубага зневажання правоў чалавека ў самым сэрцы цывілізаванай Еўропы!» - Адзначыў Далгоў.

Акрамя гэтага, чыноўнік раскрытыкаваў палітыку ў галіне грамадзянства ў Латвіі і Эстоніі.

«Па-ранейшаму вострай застаецца праблема масавай адсутнасці грамадзянства ў Латвіі і Эстоніі... Патрабуем ад міжнароднай супольнасці аказаць рашучае ўздзеянне на латвійскія і эстонскія ўлады з тым, каб гэта ганебная з'ява была назаўжды ліквідаваная ў Еўропе», - сказаў Далгоў.

Таксама прадстаўнік расейскага МЗС выказаў заклапочанасць ростам неанацысцкіх і ксенафобскіх настрояў у Еўропе, прыводзячы ў прыклад развіццё падзей ва Украіне пасля «антыканстытуцыйнага перавароту» і «ўзброеннага захопу ўлады».