Wizz Air закрывае філіял ва Украіне
1- 26.03.2015, 12:48
- 8,154
Група Wizz Air з 20 красавіка закрывае сваю ўкраінскую авіякампанію «Віз Эйр Украіна».
Пра гэта паведамляе сайт кампаніі.
Зачыняюцца маршруты ў Барселону, Валенсію, Кутаісі, Маскву, Мілан, Неапаль, Венецыю. Пасажырам, якія набылі квіткі на гэтыя рэйсы, вернуць іх поўны кошт, піша «Европейская правда».
Пры гэтым Wizz Air застаецца працаваць ва Украіне, але ў меншых маштабах. З 20 красавіка Wizz Air Hungary будзе выконваць толькі 8 рэйсаў ва Украіну і з Украіны - у Будапешт, Лондан, Кёльн, Дортмунд, Гамбург, Катавіцэ, Ларнаку і Мюнхен.
Пасажырам, якія набылі квіткі на гэтыя рэйсы на даты з 20 красавіка 2015 года, патрэбна перабраніраваць пералёт праз авіякампанію Wizz Air Hungary.
«4 чэрвеня адбудзецца адкрыццё базы ў Кіеве, на якой будзе грунтавацца адзін самалёт Airbus A320. Таксама 20 красавіка «Віз Эйр Украіна», авіякампанія, якая цяпер выконвае 16 рэйсаў двума самалётамі, спыняе сваю дзейнасць», - гаворыцца ў паведамленні.
У кампаніі адзначылі, што былі вымушаныя прыняць такую пастанову праз напружанасць ва Усходняй Украіне, дэвальвацыю і няўстойлівасць украінскай грыўні, абмежаванні плацяжоў пастаўшчыкам у сувязі з кантролем за замежнай валютай і нявызначанасцю новых парадкаў для авіяцыі і абмежаванняў, якія могуць быць гэтым выкліканыя.
Варта адзначыць, што кампанія Wizz Air Hungary цяпер будзе выконваць рэйсы ў адпаведнасці з венгерскім заканадаўствам і пасажыры вымушаныя будуць плаціць за кожную адзінку багажу. Украінская кампанія падавала права бясплатна правозіць адну адзінку багажу.
У паведамленні нічога не гаворыцца пра рэйсы ўкраінскай кампаніі са Львова, аднак на сайце квіткі на іх ужо не прадаюцца.
Як паведамлялася раней, Wizz Air Ukraine ўжо скараціла колькасць самалётаў з чатырох да двух у першай палове 2014 года, услед за скарачэннем колькасці самалётаў, якія базуюцца ў Кіеве, і прыпыненнем працы ў Данецку.