Сонечная энэргетыка ў Нямеччыне дагнала прадукцыйнасць АЭС

Нямецкая сонечная энэргетыка ў мінулым месяцы выйшла на новы ўзровень.

Сонечныя панэлі ў краіне вырабілі такую ж колькасць электраэнэргіі, як і мясцовыя атамныя электрастанцыі, паведамляе Deutsche Welle.

Прынамсі, абедзве галіны ў Нямеччыне згенеравалі ў ліпені па 5,18 тэрават-гадзіны. Рэкордная прадукцыйнасць сонечных панэляў стала магчымай яшчэ і па той прычыне, што ў 2015 годзе выдалася вельмі сонечнае і ветранае лета.

Зрэшты, як адзначае выданне, дасягнуць такіх паказчыкаў было б немагчыма без мэтанакіраванай палітыкі краіны ў ажыццяўленні так званага энэргетычнага павароту (Energiewende), накіраванага на ўкараненне альтэрнатыўных і аднаўляльных крыніц энэргіі.

Таксама неабходна ўлічваць яшчэ некалькі фактараў. Нядаўна немцы канчаткова вывелі з эксплуатацыі адну з АЭС, а праца трох іншых рэактараў была прыпыненая для тэхагляду. Аднак нават з улікам усяго гэтага адмаўляць узрослую ролю альтэрнатыўнай энэргетыкі немагчыма: за ўвесь 2014 год аднаўляльныя крыніцы энэргіі забяспечылі 26,2% усёй вытворчасці электраэнэргіі ў ФРГ.

Пры гэтым традыцыйны лідар галіны - буры вугаль - застаўся ззаду. З часам вуглевадародная і ядзерная энэргетыка краіны павінны сысці ў нябыт, а асноўнымі стануць аднаўляльныя крыніцы: ужо да 2035 годзе іх доля павінна ўзрасці да 55-60%.

Інвестыцыі ў альтэрнатыўную энэргетыку растуць не толькі ў Нямеччыне. Калі ў 2009 годзе ў сусветным маштабе яны склалі $160 мільярдаў, то ўжо ў 2010-м выраслі да $211 мільярдаў, а ў 2014 годзе павялічыліся да $270 мільярдаў.