Сын кухара Пуціна трапіў у гучнае ДТЗ

Павел Прыгожын трапіў у аварыю на Gelandewagen праз 48 гадзін пасля яго куплі.

Уночы ў нядзелю, 18 снежня, у Санкт-Пецярбургу сутыкнуліся BMW і Mercedes Gelandewagen. За стырном сядзеў 18-гадовы Павел Прыгожын — сын Яўгена Прыгожына, кухара Пуціна, піша «Фонтанка.ру».

Праз паўгадзіны пасля аварыі ў групе «ДТЗ і НЗ» карыстальнік Сяргей Святлоў апублікаваў допіс: «У BMW пасажырцы заціснула ногі. Кіроўца „Геліка“, хлапчук гадоў дваццаці, сказаў, што ён ехаў на чырвонае святло. У салоне, акрамя маладога кіроўцы, знаходзіўся адзін пасажыр. Яны абое выйшлі, аператыўна скруцілі нумары, паклалі ў салон», — удакладніў сведка.

Адзначаецца, што перакулены на бок Gelandewagen ставілі на колы сіламі двух эвакуатараў. Самаход пагрузілі і павезлі ў аўтасалон «Авангард» на Прыморскім праспекце, дзе ён быў набыты менш як за 48 гадзін да сутыкнення. Кошт, мяркуючы з афіцыйных расцэнак салона, — 12 млн рублёў (амаль 195 000 даляраў).

— Рэгуляванае скрыжаванне, і хто-небудзь з удзельнікаў ДТЗ праехаў на забаронены сігнал святлафора, — удакладніла крыніца. — Зрэшты, аб ступені віны казаць заўчасна, кіроўцы яшчэ не апытаныя.