Лукашэнка падпісаў закон аб «абароне дзяцей ад шкоднай інфармацыі»

Закон Рэспублікі Беларусь ад 11 траўня 2016 г. №362-З апублікаваны сёння на Нацыянальным прававым інтэрнэт-партале.

Аляксандр Лукашэнка падпісаў закон, які ўводзіць «дадатковыя меры па абароне дзяцей ад інфармацыі, якая можа нанесці шкоду іх здароўю і развіццю».

Як паведамляе БелТА, змены і дапаўненні ўносяцца ў законы аб правах дзіцяці, аб рэкламе, аб сродках масавай інфармацыі, аб інфармацыі, інфарматызацыі і абароне інфармацыі, а таксама аб выдавецкай справе. Большасць паправак пачне дзейнічаць з 1 ліпеня 2017 года.

Між іншым, закон уводзіць маркіроўку інфармацыйнай прадукцыі з указаннем узроставай катэгорыі: «0+» (што азначае без абмежаванняў), «6+» (для асоб, якія дасягнулі шасці гадоў), а таксама катэгорыі «12+», «16+» і «18 +».

Цяпер юрыдычныя асобы і індывідуальныя прадпрымальнікі, якія займаюцца вытворчасцю і (або) распаўсюджваннем інфармацыйнай прадукцыі, будуць абавязаны надаваць такой прадукцыі знак узроставай катэгорыі.

Паводле новага закона, уласнікі кампутарных клубаў, інтэрнэт-кавярняў і іншых месцаў, дзе ёсць калектыўны доступ карыстальнікаў інтэрнэту, а таксама ўстановы адукацыi абавязаныя ўжываць разнастайныя сродкі, каб не распаўсюджваць сярод дзяцей інфармацыю, якая наносіць шкоду іх здароўю і развіццю.