Падаткавікі запісалі ў «дармаеды» 400 тысяч беларусаў

Падатковая далей высылае беларусам «лісты шчасця».

Падатковыя органы накіравалі амаль 400 тысяч апавяшчэнняў аб выплаце збору асобамі, якія не ўдзельнічаюць у фінансаванні дзяржаўных выдаткаў («падатку на дармаедства»), паведаміў на брыфінгу ў прэс-цэнтры БелТА 13 студзеня начальнік галоўнай управы падаткаабкладання фізічных асоб Міністэрства падаткаў і збораў Міхаіл Расолька.

З ягоных слоў, збор ужо заплацілі амаль 24 тысячы чалавек. Малую колькасць плацельшчыкаў Расолька звязвае з тым, што ў многіх з іх тэрміны выплаты прыпадалі на студзень.

«Бюджэтныя паступленні ад падатку на дармаедства на гэты момант склалі 7 млн рублёў», — паведаміў ён.

Расолька не змог удакладніць, якая колькасць грамадзян, якія атрымалі паведамленне на выплату збору, змагла давесці, што атрымалі іх памылкова і плаціць не павінны, бо падатковыя органы не вядуць такой статыстыкі. Лічбы, якія раней фігуравалі ў СМІ, — 15 тысяч чалавек — чыноўнік назваў некарэктнымі, паколькі гэта тыя людзі, якія яшчэ да атрымання апавяшчэнняў змаглі давесці свой удзел у фінансаванні дзяржаўных выдаткаў і паведамлення ім не накіроўваліся зусім.

Нагадаем, Лукашэнка 12 студзеня падпісаў дэкрэт №1 аб унясенні змяненняў у дэкрэт ад 2 красавіка 2015 года № 3 «Аб папярэджанні сацыяльнага ўтрыманства». Новым дакументам удакладнены пералік перыядаў дзейнасці, цягам якіх грамадзяне прызнаюцца ўдзельнікамі фінансавання дзяржаўных выдаткаў.