Ва Упраўленні справамі Акадэміі навук асцерагаюцца масавых звальненняў

З работнікамі перасталі падаўжаць кантракты.

У рэдакцыю praca-by.info звярнуліся работнікі Упраўлення справамі НАН Беларусі: з канца мінулага года з імі перасталі падаўжаць кантракты.

– Пад ударам апынуўся персанал, які абслугоўвае будынак прэзідыума Акадэміі навук, Інстытута гісторыі, паліклініку, інтэрнаты і дамы, дзе жывуць супрацоўнікі Акадэміі навук. З прыбіральшчыцамі, вахцёрам, сантэхнікамі, электрыкамі, сталярамі і іншымі з канца мінулага года не працягваюць кантракты. Калі так пойдзе далей, то працы могуць пазбавіцца 60-70 чалавек. Людзі ў шоку, як вы разумееце, знайсці працу сёння вельмі складана, – распавялі работнікі дзяржаўнага прадпрыемства «Упраўленне справамі НАН Беларусі».

– Наколькі нам вядома, прычына звальненняў у тым, што цяпер абслугоўваннем вышэйзгаданых будынкаў будзе займацца кампанія «Клінінг-плюс», якая выйграла адпаведны тэндэр. Ужо былі выпадкі, калі чалавека, які прапрацаваў тут шмат гадоў, звальняюць, а на яго месца адразу ж бяруць іншага. Магчыма, такім чынам хочуць зэканоміць на заробках персаналу. У любым выпадку ў дачыненні да работнікаў усё гэта выглядае непрыгожа.

У той жа час, як стала вядома, прынамсі, частцы прыбіральшчыц прапанавалі напісаць заяву на звальненне, а затым аформіцца ў новую кампанію – пры гэтым яны будуць працягваць працаваць на ранейшым месцы.

А вось як пракаментаваў сітуацыю, якая склалася, дырэктар Упраўлення справамі НАН Беларусі Мікалай Бітус:

– Так, сапраўды, у канцы мінулага года прэзідыум Акадэміі навук праводзіў таргі. Мы прайгралі тры тэндэры: знешняя ўборка, унутраная ўборка, тэхнічнае абслугоўванне. Хаця, калісьці і ствараліся для гэтага Міхаілам Мясніковічам.

Яны (кампанія «Клінінг-плюс» - заўв.) прапанавалі прыкметна меншую цану. Ад прыватнай кампаніі чулі такое тлумачэнне: мы сыходзім у мінус, каб заваяваць рынкі, і будзем іх утрымліваць за кошт прыбытку з іншых участкаў. Кантракт з імі падпісаны да канца года – паглядзім, як яны будуць працаваць, праз год сітуацыя можа змяніцца.

Нашы людзі пераходзяць на працу да іх. Толькі калі ў нас яны працавалі на стаўку, то там будуць на паўстаўкі. Хоць хтосьці і звальняецца, і сыходзіць на пенсію. Але мы спрабуем працаўладкаваць усіх, каб людзі не апынуліся на вуліцы.