Як Еўропа пабудуе сваю абарону

У ЕЗ распрацавалі амбіцыйны абаронны пакет, заснаваны на «трох слупах».

«Заканчэнне халоднай вайны прынесла з сабой абяцанне міру ў Еўропе. І калі ўнутры ЕЗ мы змаглі стрымаць гэтае абяцанне, то праз чвэрць стагоддзя мы на сваім уласным досведзе засвоілі ўрок аб тым, што нестабільнасць за рысаю межаў наўпрост адбіваецца на бяспецы еўрапейскіх грамадзян; гэта вымусіла нас радыкальна перагледзець наша супрацоўніцтва ў галіне абароны», - пішуць у артыкуле, апублікаваным у італійскай газеце La Stampa (пераклад - inopressa.ru), Федэрыка Магерыні, кіраўніца замежнапалітычнай структуры Еўразвязу, і Юркі Катайнэн, віцэ-старшыня Еўракамісіі.

«У мінулыя месяцы мы распрацавалі амбіцыйны абаронны пакет, заснаваны на трох слупах», - паведамляюць Магерыні і Катайнэн. Першы слуп - гэта «дзеянне на замежнапалітычным фронце», пішуць яны. «З прычыны чаго ў рамках глабальнай стратэгіі ЕЗ фармулюецца шэраг канкрэтных прапаноў, такіх як план для ўжывання захадаў у галіне бяспекі і абароны, які вызначае «мадэль еўрапейскай бяспекі», заснаваную на стварэнні партнёрства, на падтрымцы прымірэння і на ўзмацненні ўстойлівасці з мэтай прадухілення крызісаў і іх праявы», - гаворыцца ў артыкуле.

«Па-другое, - прадаўжаюць Магерыні і Катайнэн, - мы маем патрэбу ў больш цесным супрацоўніцтве з нашымі асноўнымі партнёрамі ў галіне бяспекі, пачынаючы з NATO. У снежні ЕЗ і NATO адобрылі 42 канкрэтныя дзеянні, накіраваныя на рэалізацыю супольнай заявы, падпісанай у ліпені мінулага года».

«Два першыя слупы не могуць быць ажыццёўленыя без інвестыцый на развіццё даследаванняў і патэнцыялу», - адзначаюць кіраўнік дыпламатычнай місіі ЕЗ і віцэ-старшыня Еўракамісіі. «З гэтай мэтай, - тлумачаць яны, - Еўракамісія падала на разгляд еўрапейскі план дзеянняў у галіне абароны - і гэта трэці слуп нашага пакета». Як гаворыцца ў артыкуле, «паводле некаторых ацэнак, недастатковае супрацоўніцтва паміж краінамі-чальцамі ЕЗ «абыходзіцца Еўразвязу ў «100 мільярдаў еўраў на год». «Супрацоўніцтва жыццёва неабходнае для дасягнення эканоміі на маштабе вытворчасці ў інавацыях і дзяржзаказах», - удакладняюць аўтары.

«Мы пачнём з новага фінансавання даследаванняў, - пішуць Магерыні і Катайнэн. - Пасля пілотнай фазы да 2020 года мы мяркуем, што наступны бюджэт ЕЗ павінен вылучыць 500 мільёнаў еўраў на год на інавацыйныя тэхналогіі ў галіне абароны».

«У сакавіку гэтага года нашаму Еўразвязу будзе 60 гадоў. Надышоў момант сур'ёзна паставіцца да нашай бяспекі і рушыць да сапраўднага абароннага саюзу, які змог бы яе гарантаваць», - рэзюмуюць аўтары.