Замбія хоча збіраць трактары «Беларусь»

Для гэтага на МТЗ прыехала дэлегацыя Міністэрства абароны з афрыканскай краіны.

Рэспубліка Замбія, якая зрабіла стаўку на апераджальнае развіццё сельскай гаспадаркі, зацікаўленая ў арганізацыі зборачнай вытворчасці трактароў на сваёй тэрыторыі. Патрэба гэтай паўднёваафрыканскай краіны ў такой тэхніцы прыблізна складае 50 тысяч адзінак. Больш за ўсё замбійцы хацелі б выпускаць у сябе трактары маркі Belarus.

З намерамі прадметна абмеркаваць магчымасць арганізацыі зборкі беларускіх трактароў на сваёй тэрыторыі Менскі трактарны завод на гэтым тыдні наведала дэлегацыя Замбіі на чале са сталым сакратаром міністэрства абароны краіны Стардзі Мвале (Sturdy Mwale), паведамляе прэс-служба ААТ «МТЗ».

«Мы зрабілі выбар на карысць Менскага трактарнага завода, вывучыўшы наяўныя на сусветным рынку прапановы. Гэта прадпрыемства з размахам, якое выпускае надзейную тэхніку і мае вялікі досвед яе вытворчасці. Мы хацелі б перанесці гэты досвед у сваю краіну», - заявіў кіраўнік дэлегацыі Замбіі.

Госці азнаёміліся з прадпрыемствам, яго гісторыяй, сучаснымі тэхналогіямі вытворчасці і лінейкай выпуску тэхнікі. Затым адбыліся перамовы з удзелам генеральнага дырэктара ААТ «МТЗ» Фёдара Дамаценкі.

Стардзі Мвале выказаў вялікую зацікаўленасць замбійскага боку ў развіцці супрацоўніцтва з Менскім трактарным заводам, адзначыўшы, што высокі ўзровень арганізацыі вытворчасці на МТЗ робіць глыбокае ўражанне.

«Доўгія гады Замбія залежала ад здабычы меднай руды. Цяпер настаў час перайсці да развіцця сельскай гаспадаркі. У краіне ўсталяваўся парадак, і мы маем намер узяць курс на механізацыю. Шырокі спектр тэхнікі Belarus уключае ўсё, што нам неабходна: ад міні-трактароў, якія ўжо ў найбліжэйшай перспектыве могуць замяніць нашым сялянам дагэтуль выкарыстоўваныя імі матыкі, да больш магутных мадэляў. Уся тэхніка МТЗ, у тым ліку камунальная, будзе карыстацца ў Замбіі вялікім попытам», - адзначыў Стардзі Мвале.

Стардзі Мвале таксама запэўніў, што міністэрства абароны ягонай краіны гатова ўзяць на сябе ўсе гарантыі для прасоўвання трактароў Belarus на тэрыторыі Замбіі, а таксама стаць пляцоўкай для выхаду на рынкі найбліжэйшых краін.

«Як мінімум 50 тысяч замбійскіх сялян будуць радыя стварэнню зборачнай вытворчасці беларускай трактарнай тэхнікі і магчымасці з яе дапамогай механізаваць сваю працу», - удакладніў Стардзі Мвале.

Фёдар Дамаценка ў сваю чаргу агучыў гатоўнасць ААТ «МТЗ» да супрацоўніцтва на ўзаемавыгадных умовах. Былі дасягнутыя папярэднія дамоўленасці.