Герой нацыянальнага сцяга з Вілейкі абвясціў галадоўку
11- 6.10.2017, 9:36
- 22,968
Аляксандр Вянгерскі наважыў змагацца не толькі за сябе, але і за ўсіх палітвязняў.
Футбольны заўзятар Аляксандр Вянгерскі з Вілейкі, які адбывае арышт у ізалятары часовага ўтрымання ў Барысаве, абвясціў галадоўку на знак падтрымкі ўсіх палітвязняў, якія цяпер знаходзяцца за кратамі. Сайту spring96.org пра гэта паведаміў актывіст з Вілейкі Аляксей Сюдак, якому Вянгерскі даслаў ліст.
«Я, Вянгерскі Аляксандр, знаходзячыся ў ІЧУ Барысаўскага раёна, 5.10. 2017 абвяшчаю галадоўку ў сувязь з тым, што не згодны з артыкулам 23.4 КоАП, бо супрацоўнікі праваахоўных органаў давалі розныя сведчанні, а аднаго з іх я ўбачыў у зале суда ўпершыню. З майго боку непадпарадкавання і прыніжэння супрацоўнікаў міліцыі не было», - паведамляе заўзятар ў лісце.
Галадоўку Аляксандр Вянгерскі праводзіць у падтрымку ўсіх палітвязняў, якія цяпер знаходзяцца за кратамі.
Нагадаем, 29 верасня суд Барысаўскага раёна прысудзіў Аляксандра Вянгерскага да 10 дзён адміністрацыйнага арышту нібыта за ўчыненне «адміністрацыйных правапарушэнняў»: «дробнага хуліганства» і «непадпарадкавання законнаму патрабаванню службовай асобы».
Нагадаем, што У Барысаве 28 верасня падчас матчу паміж футбольнымі камандамі БАТЭ і «Арсенал» на поле выбег заўзятар з бел-чырвона-белым сцягам і з гербам «Пагоня». Яго затрымала ахова стадыёна і вывела з поля. Пазней стала вядома, што затрыманы - жыхар Вілейкі Аляксандр Вянгерскі.