Расея прыгатавала «газавую прынаду» для Лукашэнкі
6- 23.11.2017, 14:58
- 51,864
З'явілася фота дакумента з новымі коштамі газу.
Расея зніжае кошт газу для Беларусі. Гэта прадугледжанае зменамі ў пагадненні паміж урадамі Беларусі і Расеі, які 23 лістапада разглядае «палата прадстаўнікоў», паведамляе euroradio.fm.
Згодна з дакументам, у 2018 годзе Беларусь будзе плаціць $129 за 1 тысячу кубаметраў расейскага прыроднага газу. У 2019 годзе кошт апусціцца яшчэ на $2 - да $127.
Пасля падпісання змяненняў у пагадненне гэтыя кошты павінны быць зафіксаваныя ў кантрактах паміж расейскім прадпрыемствам «Газпром» і беларускім «Газпром трансгаз Беларусь».
У 2017 годзе Беларусь і Расея доўга не маглі развязаць «газавае пытанне». У дакументах быў зафіксаваны тарыф $132 за 1 тысячу кубаметраў, аднак Аляксандр Лукашэнка заяўляў, што блакітнае паліва абыходзіцца нашай краіне значна танней - па $107 за 1000 м3.
Раз'юшаны такім нахабствам «Газпром» у сакавіку павысіў кошты да $141,1 за тысячу кубаметраў. Але ў выніку перамоваў на ўзроўні кіраўнікоў краін кошт газу знізіўся да $130, прычым Беларусь вытаргавала яшчэ і кампенсацыю за кошт экспартных падаткаў на нафту.