Даверлівыя беларускі купіліся на абяцанні віртуальных «маракоў»
10- 23.11.2017, 17:55
- 25,538
Віртуальныя «маракі» пазбавілі дзвюх жыхарак Воршы зберажэнняў.
Цягам доўгага часу дзве жыхаркі гэтага горада, не знаёмыя і не злучаныя паміж сабой, актыўна перапісваліся ў сацыяльных сетках з мужчынамі, якія прадставіліся маракамі далёкага плавання, паведамляе БелТА.
Кантакты прывялі да заканамернага выніку - дамы закахаліся, купіўшыся на ласкавыя і кранальныя лісты, кампліменты і абяцанне ажаніцца.
Дайшла справа і да падарункаў. «Любая, я хачу падарыць табе залаты пярсцёнак. Яго прывязе мой кур’ер, бо я яшчэ ў моры. Ён прышле табе паведамленне са сваім рахункам і скажа, колькі будзе каштаваць ягоная паслуга». Лісты прыкладна такога зместу атрымалі жанчыны ад сваіх кавалераў і даверліва перавялі праз інфакіёск на названыя рахункі электронных партманэтаў запатрабаваныя сумы.
Абедзвюх, як і варта было чакаць, адразу пасля праведзенай аперацыі дома чакаў непрыемны сюрпрыз: суровыя маракі выдалілі свае старонкі з сацыяльных сетак.
Нагадаем, міліцыя ўжо неаднаразова заклікала карыстальнікаў сацыяльных сетак быць пільнымі ў сацсетках з сябрамі і знаёмымі, і ў выпадку просьбы перавесці грошы падумаць аб магчымым махлярстве.
Аднак, як можна пераканацца на прыкладзе чарговых ахвяр з Воршы, шмат хто думае, што асабіста яго гэта не закране.