У дыктатара забралі галоўную рэзідэнцыю

Суд канчаткова вярнуў Межыгор'е дзяржаве.

Як паведаміў у сваім Facebook міністр экалогіі і прыродных рэсурсаў Украіны Астап Семерак, Вышэйшы гаспадарчы суд Украіны паставіў кропку ў справе «Межыгор'я», перадаўшы былую ўрадавую рэзідэнцыю ва ўласнасць дзяржавы.

Са слоў Семерака, чыё ведамства і ініцыявала судовы разгляд, наступным крокам стане інвентарызацыя маёмасці і вызначэнне органа, які будзе ёй кіраваць.

Міністр паабяцаў, што ў далейшым рэзідэнцыя і навакольныя тэрыторыя стануць прыродным запаведнікам, адукацыйным і навуковым цэнтрам, дзе будзе забяспечаны догляд за рэдкімі жывёламі і раслінамі.

Пастанове Вышэйшага гаспадарчага суда папярэднічала пастанове Кіеўскага апеляцыйнага гаспадарчага суда, які прызнаў несапраўднымі дамовы 2007 года, паводле якіх «Межыгор'е» перадавалася з дзяржуласнасці Віктару Януковічу, які на той момант быў кіраўніком урада краіны.

«Межыгор'е» з'яўлялася дзяржаўнай урадавай рэзідэнцыяй з 1935 да 2007 год, калі яна была перададзеная ў прыватную ўласнасць. «Украінская праўда» пісала, што фармальным уладальнікам «Межыгор'і» з'яўляецца кампанія «Танталіт», якая, паводле звестак выдання, звязаная з сям'ёй Януковіча.

«Межыгор'е» было захопленае ўдзельнікамі Еўрамайдана 22 лютага, калі Януковіч ужо пакінуў Кіеў. Актывісты выявілі ўсярэдзіне загараднага дома ліфт, вальер з фазанамі, амерыканскія аўтамабілі 1960-х гадоў выпуску.

Самай вядомай знаходкай стаў так званы «залаты батон» сфатаграфаваны прэс-сакратаром партыі «Свабода» Аляксандрам Аронцам. Потым, аднак, гэтая знаходка знікла. Крымінальная справа паводле факта знікнення розных каштоўнасцяў з «Межыгор'я» была закрытая ў траўні 2016 года. Прадстаўнік прэс-службы паліцыі Кіеўскай вобласці патлумачыў гэта адсутнасцю заявы з боку пацярпелага, а таксама праз сумнеўнасць самога факта існавання «залатога батона».