Вакарчук адмовіўся ад пасады прэзідэнта Украіны, але абвясціў «Дэкалог рэформаў»
7- 11.12.2017, 9:26
- 13,082
Праграма музыканта налічвае 10 пунктаў.
Музыка Святаслаў Вакарчук заявіў, што ўлада яго не цікавіць і ён не мае намеру балатавацца ў прэзідэнты Украіны. Пра гэта ён распавёў у відэазвароце, абнародаваным на YouTube-канале Святаслаў Вакарчук official.
«Я ніколі не заяўляў пра свае прэзідэнцкія амбіцыі. Я не збіраюся гэтага рабіць і сёння», - падкрэсліў музыка.
Ён паведаміў, што ніколі не замаўляў ніякіх даследаванняў, а да апублікаваных прэзідэнцкіх рэйтынгаў ставіцца стрымана.
Вакарчук адзначыў, што з'яўляецца самадастатковым чалавекам, за якім не стаяць чужыя грошы. Свае грошы ён зарабіў сам.
Са слоў музыкі, ён вучыцца ў Стэнфардскім універсітэце і часткова аплачвае навучанне трох украінцаў у гэтай ВНУ.
Ён таксама назваў 10 пунктаў, якія, на яго думку, неабходныя для развіцця Украіны. Сярод іх стварэнне незалежнага антыкарупцыйнага суда, змяненне выбарчага заканадаўства і новы склад Цэнтральнай выбарчай камісіі, сфармаваны з прафесійных экспертаў.
Акрамя таго, Вакарчук адзначыў неабходнасць правядзення рэформаў дзяржаўнай службы, Службы бяспекі Украіны, правядзення дзейснай прыватызацыі і забарона на палітычны лабізм.
Палітыкі павінны змяніць правілы сваіх паводзін і стаць больш адкрытымі, у іх таксама павінен з'явіцца «прынцып адказнасці» - на думку Вакарчука, палітыкі павінны навучыцца выконваць абяцанае.
Сярод неабходных змяненняў музыкант таксама назваў культуру празрыстай камунікацыі, калі дзеянні палітыкаў павінны мець лагічнае тлумачэнне, і публічна акрэсленыя межы дазволенага.
«Мы ўсе разам павінны ўдзельнічаць у стварэнні нашай дзяржавы. Незалежна ад узросту, прафесіі, роду заняткаў або месца пражывання. Кожны дзень рабіць нашу краіну лепшай і больш паспяховай», - падкрэсліў ён.
Вакарчук заклікаў палітыкаў у пакінутыя паўтара гады да прэзідэнцкіх выбараў зрабіць усё магчымае, каб правесці неабходныя рэформы ва Украіне.