Замежнікі абвясцілі байкот рублю

Інвестары зрабілі выснову з новых санкцый.

Прыток замежнага капіталу ў рублі і расейскія дзяржаўныя аблігацыі, які падтрымліваў валютны рынак ва ўмовах санкцый, і зніжаных коштаў нафты, спыніўся, піша finanz.ru.

Як паведаміў у аўторак ЦБ РФ, у кастрычніку замежныя інвестары купілі аблігацый федэральнага займу ўсяго на 3 млрд рублёў. У параўнанні з папярэднім месяцам сума інвестыцый у пазыковыя паперы ўрада РФ абрынулася ў 50 разоў.

На 1 лістапада нерэзідэнты трымалі АФЗ на 2,184 трлн рублёў, а іх дзель на рынку апусцілася з 33,2% да 32,7%. За месяц замежнікі купілі толькі 2,5% ад папер, якія Мінфін выкінуў на рынак.

Попыт на аўкцыёнах, якія штотыдзень праводзіць Мінфін, стваралі толькі "дочкі" замежных банкаў. На другасным рынку нерэзідэнты і зусім сталі чыстымі прадаўцамі, а на рынку карпаратыўных аблігацый наладзілі распродаж, пазбавіўшыся ад укладанняў на суму блізу 30 млрд рублёў, вынікае са звестак цэнтрабанку.

У лістападзе і снежні якіх-небудзь паляпшэнняў у настроях замежнікаў не адбылося: з пяці лістападаўскіх аўкцыёнаў два закончыліся няўдала - Мінфін не змог прадаць увесь запланаваны аб'ём, нават нягледзячы на тое, што сумы размяшчэнняў былі зніжаныя ўдвая.

У снежні попыт вярнуўся: на апошнім аўкцыёне ён у 2,5 разы перавысіў прапанову (63 рублёў супраць 25). Але нерэзідэнтаў, сярод пакупнікоў, не было, кажа кіраўнік аналітыкі банка "Зеніт" Уладзімір Еўсціфееў: практычна ўсе АФЗ выкупляюцца расейскімі ж інвестарамі.

Хутчэй за ўсё, гэта пенсійныя фонды, якія атрымалі грошы з саніраванага "Адкрыцця" і Бінбанка, кажа аналітык Райффайэнбанка Дзяніс Парывай. Яны, у сваю чаргу, фінансуюцца друкаваным станком ЦБ, які крэдытуе іх у рамках экстранага механізму (МЭПЛ).

Цікавасць нерэзідэнтаў, скупляць расейскія дзяржаўныя паперы для гульні на высокіх адсоткавых стаўках, спынілася на фоне пагрозы пашырэння санкцый ЗША, кажа галоўны эканаміст у ING Расеі ды СНД Дзмітрый Палявы.

Да лютага амерыканскі Мінфін павінен вызначыць, ці трэба абмяжоўваць інвестыцыі ў расейскую дзяржаўную завінавачанасць, куды замежнікі ўклалі 19 млрд даляраў за два гады, забяспечыўшы амаль дзве траціны сумы, якую Мінфін пазычыў на рынку для бюджэту.

У мяккім варыянце санкцыі толькі спыняць новыя інвестыцыі ў рубель, у цвёрдым - могуць забараніць валоданне паперамі у прынцыпе, правакуючы распродаж і вывад з Расеі 35 млрд даляраў. "У такім выпадку санкцыі будуць мець эфект выбуху бомбы, - кажа Парывай. - Гэта будзе азначаць, што амерыканскія банкі не змогуць мець стасункаў з расейскімі банкамі".

Зрэшты, і без санкцый "залатая эра" кэры-трэйда на рублі, калі расейскую валюту скуплялі праз высокую даходнасць, падыходзіць да канца, адзначае генеральны дырэктар Sputnik AM у Маскве Аляксандр Лосеў.

Нерэзідэнтаў цягне высокая рэальная стаўка - тое, наколькі прыбытковасць дзяржаўных папер перавышае інфляцыю. У Расеі гэты паказчык - самы высокі ў свеце (больш за 5%), а ў ЗША - адмоўны: стаўка ФРС ніжэйшая, чым хуткасць, з якой растуць кошты.

Розніца паміж рэальнымі адсоткавымі стаўкамі ў РФ і Штатах складае 5,85 адсоткавага пункта. Яе звужэнне да 3,5 адсоткавага пункта зробіць інвестыцыі ў расейскія актывы непрывабнымі, заявілі большасць інвэстмэнэджараў падчас апытання, праведзенага Bloombergу кастрычніку.

"Далейшае зніжэнне ключавой стаўкі Банкам Расеі пры паступовым падвышэнні ўліковай стаўкі ФРС ЗША скароціць адсоткавы арбітраж да тых узроўняў, якія ўжо не будуць кампенсаваць гульцам рызыкі краіны", - тлумачыць Лосеў.

Пазбаўляцца ад АФЗ проста цяпер, хутчэй за ўсё, яшчэ рана, але распродаж у пачатку наступнага года магчымы, сказаў Bloomberg аналітык Manulife Asset Management у Лондане Рычард Сігал.

"Рынак уразлівы ў выпадку фіксацыі прыбытку і распаўсюджвання негатыўных настрояў, інфляцыя ў РФ, магчыма, дасягнула свайго дна, у той час як дывідэнды дзяржкампаній будуць ніжэйшыя за чаканні, а выдаткі бюджэту вырастуць перад выбарамі", - тлумачыць ён.