Мужчыну ў Баранавічах, які праехаў аўтаспынам, абрабавалі п'яныя міліцыянты?

Падрабязнасці здарэння ва ўправе СК Берасцейскай вобласці раскрываць не хочуць.

У канцы лістапада Следчы камітэт пачаў крымінальную справу: у 43-гадовага мужчыны з Ляхавічаў «адкрыта выкралі» 70 рублёў. Цікава, што ў якасці падазраваных праходзяць два міліцыянты, піша nn.by.

Дакладнай інфармацыі няшмат. Следчы камітэт пацвердзіў, што 25 лістапада распачатая справа паводле артыкула «рабаванне». Падазраюцца тры мужчыны: 32-гадовы і 30-гадовы жыхары Ляхавічаў, 28-гадовы жыхар Баранавічаў. Іншых жа падрабязнасцяў здарэння ва ўправе Следчага камітэта Берасцейскай вобласці раскрываць не хочуць.

Тым часам у Ляхавічах ходзяць чуткі, што ў злачынстве падазраюць мясцовых міліцыянтаў.

Быццам бы 24 лістапада двое супрацоўнікаў дэпартамента аховы, прапаршчыка і капітана, якія разам выпівалі ў Баранавічах. Знаёмы павёз іх «па дабаўку», па шляху яны падабралі мужчыну, які галасаваў на абочыне. Пасажыр стаў дзяліцца тым, як ён не любіць міліцыю, і расказваць, як яго пазбавілі пасведчання кіроўцы за кіраванне аўто ў стане алкагольнага ап'янення. Такія размовы міліцыянтам не спадабаліся, тады яны ці то прыстрашылі выпадковаму пасажыру гвалтам, ці то, некалькі разоў ударыўшы, адабралі ў яго 70 рублёў.

Наколькі гэтая версія адпавядае рэчаіснасці, высветліць пакуль складана.

«Мы ніяк не будзем каментаваць гэтую гісторыю. Мужчына даў паказанні на нашых супрацоўнікаў, але гэта пакуль усяго толькі словы аднаго чалавека», - паведаміў «Нашай Ніве» Уладзімір Цянчык, начальнік аддзела ідэалагічнай працы Берасцейскага абласнога дэпартамента аховы.

Следчыя паведамілі, што ўсе трое падазраваных пад падпіскай аб нявыездзе. Калі мужчын прызнаюць вінаватымі, ім пагражае да 6 гадоў зняволення.