У Нарвегіі кот перажыў 40 хвілін мыцця ў рэжыме для воўны

У Осла (Нарвегія) кот па мянушцы Зера выпадкова трапіў у пральную машыну і перажыў 40 хвілін мыцця пры тэмпературы 30 градусаў.

Пра гэта паведамляе нарвежскі партал NRK.

Кот магчыма заскочыў у барабан, калі дзверцы машыны адкрылі для загрузкі бялізны. Жывёліну знайшоў 14-гадовы хлопчык Ёакім.

«Вымак наскрозь. Выглядаў зусім скручаным і больш худым, чым звычайна. Ён з цяжкасцю арыентаваўся ў прасторы, яго пачало ванітаваць», - распавёў ён.

Пацярпелага адвезлі ў ветэрынарную клініку, там яму паставілі кропельніцу. За два дні кот вярнуўся да сваіх гаспадароў - цяпер яны вельмі ўважліва аглядаюць пральную машыну перад запускам.