«Хварэць у нас у краіне нявыгадна, дорага»

Берасцейцы выказаліся пра беларускую медыцыну.

«БГ» пацікавілася ў гараджан, як часта яны наведваюць медустановы і ці давяраюць бясплатнай медыцыне.

Марына Міхайлаўна, прадавачка:

- Асабіста я рэдка наведваю медустановы, мне шанцуе. Можа, раз на год флюараграфію праходжу, усіх лекараў - і ўсё. Мне добра. Муж часцей хварэе, цяпер ён на бальнічным. Хацелася б, вядома, да бясплатных лекараў хадзіць, але чэргі вялікія, таму, калі тэрмінова, звяртаюся да платных. Калі нейкае УГД там тэрміновае. Але калі ёсць бясплатныя талоны, вядома, карыстаюся.

Вольга Леанідаўна, пенсіянерка:

- Я наведваю лекараў на патрэбу, бо я гіпертонік. Так што разы тры на год. Ну, вядома, я аддаю перавагу бясплатным медыцынскім паслугам з таго боку, што пенсія 200 рублёў, з ёй моцна не разгонішся. А з другога боку, калі бясплатна, то і лечаць на бясплатна. Сэнсу няма так лячыцца. Не заўсёды давяраю бясплатнай медыцыне. Калі б была магчымасць, то наведвала б платных лекараў.

Андрэй, наладчык абсталявання, з сынам Максімам:

- На гэты момант, пакуль дзіця, наведваю лекараў радзей. Ну, разы тры-чатыры на год. Медкамісію калі праходзіў - і ўсё. Хварэць у нас у краіне нявыгадна, дорага. У нас у Дуброўцы выдатныя лекары ў дзяржаўнай паліклініцы. Мне цалкам дастаткова іх, яны нармальна ўсё абследуюць. Бясплатнай медыцыне давяраю.

Раман, студэнт:

- За год бываю разы чатыры ў шпіталях. Пакуль я студэнт, аддаю перавагу бясплатным медыцынскім паслугам. Я давяраю бясплатным лекарам. Гэта такія ж спецыялісты, як і платныя.

Анастасія, студэнтка:

- Не болей за пяць разоў на год наведваю лекараў. Пакуль я студэнтка, так што толькі бясплатныя медыцынскія паслугі выбіраю. Мяркую, што стараннасці менш у бясплатных лекараў, але яны ўсё адно не горшыя.

Кацярына, род дзейнасці не назвала:

- Я вельмі рэдка звяртаюся да лекараў, дзякуй Богу. Але стараюся звяртацца не ў дзяржаўныя ўстановы, а больш у платныя. У першую чаргу праз чэргі. Незразумела, навошта талончыкі гэтыя прыдумалі: бярэш талончык, а ідзеш ўсё адно без чаргі. Да дзіцячага лекара мы ходзім выключна, калі патрэбен бальнічны ліст, а так выклікаем прыватнага лекара на дом. Платны доктар больш матываваны.

Аляксандр, інжынер:

- Апошнія два гады праз ваенкамат раз 18 звяртаўся да лекара. А так раз на год дзесьці зімой і вясной, калі прастуда. Звяртацца ў дзяржаўныя медустановы або ў прыватныя залежыць ад таго, колькі грошай. Калі ёсць грошы, то можна і да платных лекараў схадзіць. Бясплатнай медыцыне давяраю, чаму не?

Кацярына, інжынер-эколаг:

- Наведваю медыцынскія ўстановы толькі пры неабходнасці. Аддаю перавагу платным паслугам, бо ўвесь час няма талонаў, чакаць трэба ледзь ні тыдзень, а платныя паслугі не такія і дарагія ужо. Можна сказаць, адносна дарагія. Лекар адразу паглядзіць, і з павагай будзе ставіцца да цябе. Бясплатная медыцына можа жадаць толькі лепшага.