Новы скандал у гомельскай школе: Бацькі гатовыя звярнуцца ў пракуратуру

У гомельскай сярэдняй школе №67 наспявае сур'ёзны канфлікт.

Дырэктарка школы Ганна Мельнікава, за звальненне якой падпісаліся сотні чалавек, забараніла школьнаму калектыву ўдзельнічаць на міжнародным фестывалі.

У загадзе гаворыцца, што студзеньская паездка ў польскі горад Жывец на Міжнародны фестываль «Калейдаскоп талентаў. Зіма 2018» адмяняецца «з прычыны адсутнасці бюджэтных, пазабюджэтных крыніц фінансавання на праезд, пражыванне, сутачныя».

Бацькі і частка педагогаў з гэтым не пагадзіліся. Яны сцвярджаюць, што раней атрымалі дазвол на ўдзел і ўжо паспелі аформіць візы. Падрабязнасці новага канфлікту «Салідарнасці» расказала мама адной са школьніц, якая ў апошнія месяцы рыхтуецца да ўдзелу ў фестывалі.

«Нам сказалі - рабіце візы»

Са слоў Марыны, бацькі яшчэ ў лістападзе наважылі даведацца, ці змогуць іх дзеці паехаць у Польшчу на фестываль:

- У раённым аддзеле адукацыі нам далі выразны і зразумелы адказ: грошы на праезд і пражыванне настаўнікаў вылучаныя, з імі пытанне вырашанае. Калі вы зможаце аплаціць выдаткі за сваіх дзяцей самастойна, то як прыедзеце з Санкт-Пецярбурга (у пачатку снежня калектыў школы №67 перамог у міжнародным конкурсе ARTIS-2017), адразу ж рабіце візы ў Польшчу.

7 і 8 снежня бацькі здалі дакументы на візы, а праз некалькі дзён даведаліся пра загад дырэктаркі Мельнікавай, што забараняе паездку ў Жывец. Дакумент быў падпісаны 8 снежня, калі бацькі юных канкурсантаў здавалі дакументы.

Марына не выключае, што загад быў падпісаны прамінулай датай. З ейных слоў, бацькі былі шакаваныя пастановай адміністрацыі школы. Шмат хто абураны настолькі, што гатовыя звярнуцца ў пракуратуру - бо грошы, якія яны ўжо паспелі выдаткаваць на паездку, ім ніхто не верне.

«Каб узяць ключ ад залі для рэпетыцый, трэба пісаць заяву»

Марына распавяла пра тое, у якіх умовах праходзіць падрыхтоўка да фестывалю. З ейных слоў, ранейшая адміністрацыя школы заўсёды знаходзіла магчымасць скласці расклад заняткаў так, каб дзеці з розных змен маглі без праблем праводзіць рэпетыцыі на музычных занятках.

Цяпер жа вучням часта даводзіцца рэпеціраваць вечарамі, адвучыўшыся на ўроках музыкі і ў школе.

- Мая дачка вучыцца ў трэцім класе. У такія дні яна прыходзіць са школы ў дзевяць вечара, рыхтуе ўрокі і кладзецца спаць. А заўтра ўсё паўтараецца. Рэпетыцыі вечарамі бываюць не кожны дзень, але такое здараецца нярэдка.

Аднойчы Марына пашкадавала дачку і прапанавала ёй прагуляць вячэрнюю рэпетыцыю.

- А яна мне адказала: "Мама, мы едзем на конкурс не проста так, мы едзем, каб перамагчы. І я буду займацца нават вечарамі». І вось цяпер, пасля некалькіх месяцаў падрыхтоўкі, мне трэба сказаць ёй, што яна нікуды не паедзе?

На сцвярджэнне гамяльчанкі, нязручны расклад для рэпетыцый - не адзінае прыніжэнне, якое вымушаны трываць дзеці і іх педагогі. Калі раней для рэпетыцый у актавай залі настаўніку дастаткова было ўзяць у вахцёра ключ, то цяпер для гэтага трэба атрымаць дазвол у дырэктаркі, напісаўшы заяву.

З такім бацькі сутыкаюцца хіба што ў кабінетах чыноўнікаў, куды ў апошні час ім часцяком даводзіцца зазіраць, распавяла Марына.

«Гутаркі не будзе - дырэктарка захварэла»

Параіўшыся, бацькі наважылі пакінуць зварот у пракуратуру на крайні выпадак.

- Мы наважылі напісаць запыт персанальна дырэктарцы школы, раз яна нам не стала нічога тлумачыць, - распавяла Марына.

Таксама ліст з просьбай разабрацца ў канфліктнай сітуацыі быў накіраваны ў абласное і гарадское ўпраўленне адукацыi. На наступны дзень дырэктарка школы запрасіла Марыну да сябе на размову, каб абмеркаваць зместу ліста, а таксама каментары жанчыны, якія тая піша ў «Аднакласніках» пра сітуацыю ў школе. Сустрэча мелася адбыцца ўвечары 15 снежня.

- А за некалькі гадзін да сустрэчы мне патэлефанавала сакратарка і сказала, што гэта гутарка не адбудзецца, бо дырэктарка захварэла.

Тры дзясяткі бацькоў апынуліся ў падвешаным стане. У адміністрацыі школы іх запэўнілі, што на іх запыт дадуць адказ ва ўстаноўленыя законам тэрміны. Але паездка ў Польшчу запланаваная на 3 студзеня, а занесці грошы за ўдзел у фестывалі трэба да 21 снежня, інакш калектыў не дапусцяць да ўдзелу.

- Мы б вельмі хацелі вырашыць гэтае пытанне ўнутры школы. Таму і звярнуліся спачатку да адміністрацыі школы і ў аддзелы адукацыі, - патлумачыла пазіцыю бацькоў Марына.

Але ў найбліжэйшыя дні перад імі ўстане пытанне аб больш рашучых дзеяннях.

Праверка за праверкай

Пасля таго, як пра скандал у гомельскай школе напісалі СМІ, сюды зачасцілі праверкі. Як распавёў «Салідарнасці» бацька аднаго з школьнікаў, у школе пабывалі з інспекцыяй прадстаўнікі самых розных інстанцый. Пра тое, што канкрэтна яны правяраюць, бацькі могуць толькі здагадвацца.

У другой палове лістапада група бацькоў атрымала адказы з адміністрацыі Лукашэнкі. У лісце гаворыцца, што іх зварот перанакіраваны ў Гомельскі аблвыканкам.

Неўзабаве рушыла ўслед рэакцыя: у школу прыехаў начальнік упраўлення адукацыі Гомельскага аблвыканкама Сяргей Парошын. На старонцы бацькоўскай супольнасці ў «Аднакласніках» сцвярджаецца, што чыноўнік некалькі гадзін спрабаваў развязаць канфлікт, але ў выніку дасягнуць кампрамісу не атрымалася - дырэктарка Мельнікава не збіраецца пакідаць крэсла.