Лінас Лінкявічус: Патрэбныя новыя развязанні расейска-ўкраінскага крызісу

Прагрэс у развязанні канфлікту, справакаванага агрэсіяй Расеі супраць Украіны, недастатковы.

Міністр замежных спраў Лінас Лінкявічус 7 снежня на штогадовай сустрэчы міністраў замежных спраў Арганізацыі бяспекі і супрацоўніцтва ў Еўропе (АБСЕ) у Вене звярнуў увагу на недастатковы прагрэс у развязанні канфлікту, справакаванага агрэсіяй Расеі супраць Украіны, і заклікаў да пошуку новых развязанняў, паведамілі Charter97.org у прэс-службе МЗС Літвы.

«Прайшло 4 гады з пачатку расейскіх ваенных аперацый на ўсходзе Украіны, але перспектыва палітычнага развязання застаецца нявызначанай. Сепаратысты, якія падтрымліваюцца Крамлём, паслядоўна дэстабілізуюць палітычную сітуацыю і становішча ў галіне бяспекі на ўсходзе Украіны - гэта недапушчальна і павінна змяніцца. Краіны АБСЕ павінны шукаць новыя развязанні, заснаваныя на рэалізацыі Менскіх пагадненняў», - падкрэсліў міністр замежных спраў.

Падчас арганізаванай на ініцыятыву Украіны дыскусіі аб сітуацыі з правамі чалавека ў Крыме Лінкявічус звярнуў увагу на сістэматычныя парушэнні правоў чалавека на незаконна анэксаванай Расеяй паўвыспе і заклікаў узмацніць рэакцыю АБСЕ на выклікі абароне правоў і асноўных свабод чалавека.

Міністры замежных спраў краін АБСЕ 7-8 снежня абмяркоўваюць у Вене асноўныя праблемы еўрапейскай бяспекі, прынамсі, канфлікты ў рэгіёне АБСЕ, пагрозы забеспячэнню правоў і свабод чалавека, рост экстрэмізму і радыкалізацыі і г. д.

Рада міністраў АБСЕ з'яўляецца найважнейшым форумам палітычных дэбатаў і прыняцця пастаноў гэтай арганізацыі. На штогадовых нарадах міністры замежных спраў праводзяць агляд і ацэнку дзейнасці арганізацыі, абмяркоўваюць найбольш важныя пытанні бяспекі і вызначаюць вехі далейшых дзеянняў.

АБСЕ - гэта рэгіянальная арганізацыя бяспекі, якая аб'ядноўвае 57 краін Еўропы, Паўночнай Амерыкі і Цэнтральнай Азіі. Сёлета яе ўзначальвае Аўстрыя, якая ў студзені 2018 года перадасць паўнамоцтвы Італіі.