280 чалавек тэрмінова эвакуявалі з інтэрната ў Менску

Узгаранне смецця і дзвярэй стала прычынай эвакуацыі сёння раніцай 280 чалавек з інтэрната па вул. Русіянава ў Менску.

Пра гэта паведамілі ва ўправе гарадскога МНС.

У 8.33 у цэнтр аператыўнай управы праз нумар 101 ад жыхароў паступіла паведамленне пра загаранне на першым паверсе дзевяціпавярховага будынка інтэрната па вул. Русіянава. Пасля прыбыцця на месца выкліку падраздзяленняў было высветлена, што адбылося загаранне смецця пад лесвічнай клеткай і драўлянага дзвярнога блока на агульнай плошчы 4 кв.м. У выніку пажару пашкоджаны драўляны блок на першым паверсе, ПВХ-накладкі на парэнчы на двух лесвічных маршах, закураная лесвічная клетка.

Супрацоўнікамі МНС з будынка інтэрната эвакуяваныя 280 чалавек. З калідора дзявятага паверха выратаваны з дапамогай маскі мужчына 1984 года нараджэння, якому шлях эвакуацыі быў адрэзаны моцным задымленне. Ратавальнікі перадалі яго з атручаннем прадуктамі гарэння брыгадзе хуткай дапамогі для шпіталізацыі ва ўстанову аховы здароўя.

Пасля ліквідацыі пажару па медыцынскую дапамогу да брыгады хуткай дапамогі звярнулася пенсіянерка, якую з атручаннем прадуктамі гарэння таксама шпіталізавалі ў лякарню. У 8.59 пажар быў цалкам ліквідаваны.