Кіраўнік Пентагона: Мы знаходзімся ў Іраку не праз нафту

Генерал Джым Мэціс здзейсніў не абвешчаны раней візіт у Ірак на фоне пачатку наступу на Масул.

Міністр абароны ЗША Джым Мэціс заявіў у панядзелак, што ЗША не збіраюцца захопліваць іракскую нафту, паведамляе «Голас Амерыкі».

Раней нешта падобнае апраўдваў прэзідэнт Дональд Трамп, калі казаў пра «недахопы» ў дзеяннях амерыканскіх вайскоўцаў у гэтай краіне і неабходнасці прадухілення продажу нафты «Ісламскай дзяржавай».

Заява Мэціса прагучала ў ягонай размове з журналістамі, якія суправаджаюць кіраўніка Пентагона ў паездцы ў Ірак з не абвешчаным візітам, які прыпаў на другі дзень ваеннага наступу з мэтай выцяснення «Ісламскай дзяржавы» з заходніх раёнаў Масула.

«Думаю, усе, хто сабраўся ў гэтым пакоі, як і ўсе ў Амерыцы, заўсёды плацілі за нашы газ і нафту, і я ўпэўнены, што мы будзем прадаўжаць рабіць гэта ў будучыні, - сказаў Мэціс. - Мы знаходзімся ў Іраку не для таго, каб захопліваць іх нафту».

Праграма візіту Мэціса ў Ірак прадугледжвае сустрэчы з прэм'ер-міністрам Хайдэрам аль-Абадзі і іншымі афіцыйнымі асобамі, а таксама з генерал-лейтэнантам Стывенам Таўнсэндам, які камандуе кааліцыяй на чале з ЗША, ваюючай з «Ісламскай дзяржавай».

28 студзеня Трамп даручыў Мэцісу распрацаваць план актывізацыі барацьбы з «Ісламскай дзяржавай», які павінен быць прадстаўлены прэзідэнту ў 30-дзённы тэрмін.

На фоне пачатку наступу на Масул у нядзелю Мэціс заявіў аб нязменнасці ролі амерыканскіх вайскоўцаў, якая палягала ў нанясенні паветраных удараў і кансультаванні іракскіх войскаў.

«Я не хачу ўдавацца ў дэталі атакі на горад, бо павінен захоўваць канфідэнцыяльнасць дзеля жаўнераў, якія вядуць гэтую атаку. У той жа час мы вельмі блізкія да ўдзелу, калі ўжо не ўдзельнічаем у гэтай барацьбе, - сказаў ён. - Амерыканскія войскі адыгрываюць тую ж самую ролю, якую яны адыгрывалі ва ўсходняй частцы Масула. Сілы кааліцыі падтрымліваюць гэтую аперацыю, і мы будзем прадаўжаць паскоранымі тэмпамі знішчаць ІДІЛ».

Іракскія войскі выціснулі «Ісламскую дзяржаву» з усходніх раёнаў Масула ў студзені, пасля кампаніі, якая доўжылася больш за 100 дзён. Абадзі абвясціў аб пачатку наступу на заходнюю частку Масула ў нядзелю, назваўшы яго «новым этапам аперацыі».

«Нашы сілы пачынаюць вызваляць грамадзян ад тэрору «Даіш», - заявіў ён, выкарыстоўваючы арабскую абрэвіятуру для «Ісламскай дзяржавы», якая захапіла горад у сярэдзіне 2014 года. Абадзі заклікаў сілы бяспекі выконваць правы чалавека пры далейшых баявых дзеяннях.

Прадстаўнікі амерыканскіх вайскоўцаў папярэджвалі, што барацьба за заходнюю частку горада, магчыма, будзе значна больш складанай.

У наступе возьмуць удзел іракскія сілы спецыяльных аперацый, падраздзяленні рэгулярнага войска і федэральнай паліцыі, а таксама ўхваленыя ўрадам ваенізаваныя фармаванні.

ААН папярэдзіла, што сотням тысячам мірных жыхароў Масула пагражае небяспека.

«Сітуацыя сумная. Людзі, наўпрост цяпер знаходзяцца ў бядзе, - заявіла гуманітарная каардынатарка ААН у Іраку Ліз Грандэ. - Мы атрымліваем паведамленні пра бацькоў, якім з цяжкасцю ўдаецца накарміць сваіх дзяцей і абаграваць свае дамы».