Леанід Злотнікаў: ВУП Беларусі прыкметна ўпадзе

Беларускую эканоміку ў 2017 годзе чакаюць непрыемныя сюрпрызы.

У студзені ВУП краіны асеў на 0,5%. А ўрад запланаваў рост за год на 1,7%.

Іёсуб: Пытанне ў тым, хто будзе пакупніком растучай прамысловасці

Паводле звестак Нацыянальнага статыстычнага камітэта, аб'ём прамысловай вытворчасці нібыта павялічыўся ў студзені на 5,9%.

Аднак старэйшы аналітык Альпары Вадзім Іёсуб не падзяляе аптымізму ўрада з нагоды гэтай лічбы.

- Сапраўды, у прамысловасці ёсць невялікі рост пасля моцнага падзення. Але хіба гэта выхад з крызісу? Пытанне ў тым, хто будзе пакупніком нашай «адроджанай» прамысловасці. Калі раней атрыманую прадукцыю проста грузілі на склад, то затым сталі вывозіць на склады, якія належаць гандлёвым дамам у Расеі і іншым краінам. На паперы нібыта экспарт, а фактычна грошай ніякіх няма, - адзначыў Вадзім Іёсуб у каментары «Заўтра тваёй краіны».

Ён прыводзіць у прыклад схему з пастаўкамі сельгастэхнікі ў калгасы. Часта сельгаспрадпрыемствы не могуць за яе расплаціцца, і іх запазычанасці нарэшце кампенсуе дзяржава - за кошт страт для бюджэту.

Да паказчыку аб'ёму прамысловай вытворчасці старэйшы аналітык Альпары ставіцца скептычна. З яго пункту гледжання, беларуская эканоміка не зможа выйсці за год на запланаваны паказчык росту ВУП - пакуль для гэтага няма перадумоў.

На ягоную думку, наўрад ці змогуць вырасці ўнутраныя інвестыцыі без дапамогі друкарскага станка, наўрад ці варта чакаць сур'ёзнага прытоку вонкавых інвестыцый з улікам інвестыцыйнага клімату, пад вялікім пытаннем знаходзяцца поспехі ў вонкавым гандлі - не відаць новых платаздольных рынкаў для беларускай прамысловасці.

Нарэшце, трэба ўлічваць значнае скарачэнне паставак нафты з боку Расеі і пераход нафтагазавай вайны ў мяса-малочную.

- Калі рост эканомікі выявіцца за год прыблізна 0%, то гэта ўжо будзе вялікае дасягненне. Напэўна, гэта максімум, што можна атрымаць у сітуацыі, якая склалася. Значна больш рэальным развіццём падзей выглядае зніжэнне ВУП на 0,5-1%, - кажа Вадзім Іёсуб.

Злотнікаў: ВУП прыкметна ўпадзе

Эканаміст Леанід Злотнікаў таксама не бачыць фактараў росту для беларускай эканомікі і ўважае за найбольш магчымы сцэнар далейшае зніжэнне ВУП краіны.

- Гэта калі працэсы будуць праходзіць інэрцыйна. А вось калі Расея заўпарціцца, і Лукашэнка не зможа яе ўгаварыць даць больш таннай нафты і газу, то наступствы будуць мець яшчэ больш негатыўны характар. Павялічацца нашы выдаткі і сабекошт прадукцыі, ВУП прыкметна ўпадзе. Сёлета наўрад ці варта чакаць, што нейкія падзеі паўплываюць на нашу эканоміку станоўча. Хутчэй варта баяцца непрыемных сюрпрызаў, - мяркуе Леанід Злотнікаў.