Ільдар Дадзін выйшаў на волю

Каля папраўчай калоніі яго сустрэлі расейскія дэмакратычныя актывісты, жонка і сястра.

Грамадскі актывіст Ільдар Дадзін, асуджаны за парушэнне правілаў удзелу ў пікетах, выйшаў на волю. Каля папраўчай калоніі №5 Алтайскага краю ў Рубцоўску яго сустракае жонка Анастасія Зотава, сястра, актывісты мясцовага аддзялення партыі «Яблоко», дзесяць журналістаў, паведамляе «Новая газета».

Пра тое, што Дадзіна вызваляць у нядзелю, стала вядома раней у нядзелю. У калонію прыехаў самаход Кіраўніцтва спецыяльнай сувязі, каб перадаць у калонію дакументы на вызваленне.

У сераду, 22 лютага, Вярхоўны суд скасаваў прысуд у дачыненні да Ільдара Дадзіна і пастанавіў вызваліць яго. Тым не менш, на працягу некалькіх дзён Дадзіна не вызвалялі - у калонію, дзе ён адбывае тэрмін, не паступілі дакументы з суду.

Да прысуду Ільдар Дадзін некалькі разоў быў прызнаны вінаватым паводле адміністрацыйных артыкулаў аб парушэнні правілаў правядзення акцый пратэсту і непадпарадкаванні законнаму патрабаванню паліцыянта. Яго затрымлівалі за адзінкавыя пікеты ў падтрымку палітвязняў, Аляксея Навальнага, супраць вайны на Данбасе, за пікет з плакатам Je suis Charlie ў падтрымку часопіса Charlie Hebdo. У канцы студзеня 2015 года, пасля заканчэння тэрміну ягонага чарговага адміністрацыйнага арышту, у дачыненні да Дадзіна распачалі крымінальную справу паводле артыкулу 212.1 КК (неаднаразовае парушэнне парадку правядзення мітынгаў).

З лютага да снежня 2015 года Дадзін знаходзіўся пад хатнім арыштам. 7 снежня Басманны суд прысудзіў яго да трох гадоў калоніі агульнага рэжыму. У сакавіку 2016 года маскоўскі суд знізіў тэрмін пазбаўлення волі на паўгода - да двух з паловай гадоў.

У верасні 2016 года Дадзін быў этапаваны ў калонію горада Сегежа ў Карэліі. 21 лістапада «Медуза» апублікавала ліст Дадзіна сваёй жонцы пра тое, што супрацоўнікі калоніі ўжываюць да яго катаванні. Пасля скандалу ў СМІ праваахоўныя органы пачалі праверку, да Дадзіна некалькі разоў прыязджалі праваабаронцы. Нягледзячы на гэта, у Следчым камітэце не знайшлі пацвярджэнняў слоў Дадзіна. Сляды ад катаванняў, як патлумачыў Дадзін упаўнаважанай у правах чалавека ў Расеі Таццяне Маскальковай, зніклі, бо ён быў у адзенні. У снежні на просьбу Маскальковай Дадзіна перавялі ў ПК-5 у Алтайскім краі, аднак месца ягонага этапавання стала вядомае толькі 8 студзеня 2017 года.

10 лютага Канстытуцыйны суд Расеі запатрабаваў перагляду прысуду апазіцыянеру. 22 лютага прэзідыюм Вярхоўнага суда скасаваў прысуд і спыніў крымінальную справу, бо на момант распачынання крымінальнай справы не ўсе судовыя выракі ў адміністрацыйных справах за парушэнні на пікетах увайшлі ў дзеянне.