Частку «зніклых» у Менску студэнтаў з Бангладэш знайшлі ў Францыі
3- 28.02.2017, 17:25
- 21,986
Рэальнай мэтай уезду ў Беларусь большасці са «зніклых» студэнтаў была наступная міграцыя ў Еўразвяз.
Аб гэтым у інтэрв'ю карэспандэнту БелТА паведаміў міністр унутраных спраў Беларусі Ігар Шуневіч.
«Цяпер нам дакладна вядома, што рэальнай мэтай уезду большасці з іх была наступная міграцыя ў Еўразвяз. Паводле папярэдняй інфармацыі, некаторыя студэнты ўсё ж змаглі трапіць у Францыю, а іншых затрымала памежная ахова Латвіі, - сказаў Ігар Шуневіч. - Цяпер яны чакаюць пастановы аб дэпартацыі».
Нагадаем, аб знікненні студэнтаў з Бангладэш стала вядома ў пачатку студзеня. Паведамлялася, што ў Беларускім дзяржаўным эканамічным універсітэце «згубіліся» 24 студэнты, якія навучаюцца на падрыхтоўчых курсах.
16 студзеня стала вядома, што шэсць замежных студэнтаў, якія прыехалі вучыцца ў Віцебскі дзяржаўны тэхналагічны ўніверсітэт, знаходзяцца ў следчым ізалятары. Ім пагражала дэпартацыя.